Deputetja e Partisë Demokratike, Ina Zhupa ka zbuluar disa detaje në lidhje me protestën e 8 shkurtit e thirrur nga opozita.
Zhupa u shpreh në studion e News24 se kjo protestë nuk do të jetë si e herëve të tjera e shpërndarë në shumë pika po do të përqëndrohet vetëm para Kryeministrisë. Deputetja e opozitës shtoi më pas se masiviteti dhe kërkesat për të cilët thërritet protesta është pika më e fortë e opozitës.
“Protesta e ka themelin te masiviteti, do të ketë njerëz nga e gjithë Shqipëria që do të vijnë në Tiranë! nuk është si e radhës së shkuar për të dalë në disa pika, por do të bëhet para Kryeministrisë dhe ky është një ndryshim nga tre protestat e shkuara. Për mënyrën formën dhe kohëzgjatjen që do të ketë, nuk duam t’i zbulojmë. Pika jonë e fortë është masiviteti dhe kërkesat e drejta për të cilën thërritet protesta. Kur ndahesh në disa pika, vizualisht nuk të tregojnë mundësinë për të perceptuar masivitetin. Presim të jetë më masive, sepse ka arritur pikën e vlimit, sepse skandalet shtohen, sepse çdo pensionist është irrituar kur ka dëgjuar se 33 mijë euro paguhet një verë”, tha Zhupa. /Versus.al
