Një grup deputetësh të djathtë që nuk mbështesin as Sali Berishën dhe as Lulzim Bashën, të cilëve u janë bashkuar edhe aktivistë politikë dhe ish-pjesëtarë të PD-së kanë krijuar një parti të re politike.
Ata kanë prezantuar ditën e sotme partinë ‘Djathtas 1912’.
Pjesë e kësaj partie të re duke të jenë disa nga figurat e larguara nga Partia Demokratike, si Enkelejd Alibeaj, Arbi Agalliu, Flutura Açka, Seladin Jakupllari, Edvin Kulluri, Agron Kapllanaj dhe Roland Bejko.
Në prezantimin për mediat, drejtuesi i kësaj partie Enkelejd Alibeaj, teksa lexoi Kartën e Parimeve dhe Vlerave të partisë së re, u shpreh se ajo është e bazuar në 5 shtylla themelore.
“Ne besojmë në parimet e spektrit të djathtë, i cili ka në themelet e tij lirinë e individit si baza e të githë kohezionit shoqëror, ekonomik dhe politik. Për ne, përfaqësimi sa më i drejtpërdrejtë i sovranitetit popullor në çdo nivel të qeverisjes është jetësimi i lirisë. Ne e shohim zhvillimin e vendit të bazuar mbi pesë shtylla themelore të lirisë: individin, pronën, familjen, vetëqeverisjen dhe besimin”, tha Alibeaj në prezantimin e partisë.
