Deputeti Fatmir Xhafaj, ish-ministër i Brendshëm u përlot mbrëmë teksa ishte i ftuar në studion e Opinion ku foli për dosjen Babale dhe arrestimin e deputetit demokrat Ervin Salianji për kallëzim të rremë në një audiopërgjim ku pretendohej se shfaqej vëllai i Xhafajt.
Xhafaj tha se në vitet e karrierës së tij nuk mund t’i gjendej asnjë shkelje e kryer prej tij ndërsa u kërkoi falje familjarëve të tij për akuzat që janë hedhur drejt tyre nga ana e deputetëve të opozitës, duke kujtuar edhe diçka që e ëma ia kishte thënë kur ishte gjallë.
Ndërsa theksoi se pavarësisht se ka pasur të dhëna për familjarët e kundërshtarëve politikë, ai nuk i ka publikuar kurrë.
Pjesë nga diskutimi në studio:
Fatmir Xhafaj: Më lër 30 sekonda t’u kërkoj falje familjarëve të mi, shumë falje. Gjithë familjarëve të mi t’i kërkoj falje, nipërve dhe mbesave, edhe fëmijëve të atij vllait tim për dhimbjen që u kam shkaktuar. Të gjitha ato që vuajnë ata, vuajnë vetëm sepse unë kam qenë në politikë. Nëse unë nuk do të isha këtu ku jam dhe nuk do të kisha bërë këto, ata nuk do t’i kishin vuajtur këto, do të ishin njerëz të zakonshëm, do të kishin ndenjur në qetësinë e tyre. Nëna ime më ka thënë një herë shumë mirë, ‘Biri im, nuk kam vetëm një fëmijë, janë edhe këta të tjerët.
Blendi Fevziu: Jam shumë dakord, por a e keni menduar Xhafaj, ky lëndim është vetëm për ju apo ka qenë edhe për deputetë të tjerë?
Fatmir Xhafaj: Si?
Blendi Fevziu: A e mendoni që ky lëndim mund të ketë qenë për shumë njerëz të tjerë politikë dhe për ata që janë kundërshtarët e tu?
Fatmir Xhafaj: Kjo nuk do të thotë gjë. Hapeni, kam 25 vjet që flas në atë parlament, media e të gjitha. Nuk gjendet një rast i vetëm që unë të kem fyer njeri. Nuk gjendet një rast i vetëm që unë të jem marrë me familjarët e njeriu. Dhe po të them një gjë tjetër. Megjithëse për shkak të detyrës, kam pasur fakte e prova edhe për vëllezërit e këtyre personave që më kanë akuzuar mua që ta dish, kurrë nuk i kam përdorur.
Blendi Fevziu: Këtu pastaj duhet të kishte vepruar ligji në qoftë se ju kishit fakte.
Fatmir Xhafaj: Janë thënë publikisht gjërat, kanë dalë në media por kurrë prej meje. Më kanë kërkuar falje, u ka ardhur turp sepse e mendonin që me hallin që më zuri mua, unë do të dilja aty e do t’u thosha të 99-at çfarë kisha, por unë thashë jo, unë nuk merrem me familjarët tuaj, nuk kam punë me familjarët tuaj, ata kanë punët e tyre, ligji, drejtësia, siç kanë, por nuk shfrytëzoj familjarët, nuk shfrytëzoj hallin se është dhimbje kjo, e di ti çfarë është? Të të ndodhë një gjë e tillë është dhimbje!
Vëllai i Fatmir Xhafajt gjatë kohës kur ky i fundit mbante postin e ministrit të Brendshëm rezultonte i dënuar në Itali për drogë, ndërkohë që jetonte në Shqipëri i pashqetësuar. Pas denoncimit që bëri deputeti Salianji asokohe, Geron Xhafa shkoi të vetëdorëzohej në Itali për të vuajtur dënimin. Ndërsa pak muaj më vonë Xhafaj dha dorëheqje nga posti. Dënimi dhe burgosja e Ervin Salianjit, u cilësua nga opozita si hakmarrje nga ana e Xhafajt. Versus.al
