
Ambasadori i Bashkimit Europian, Silvio Gonzato ka komentuar në një intervistë nga A2CNN rezultatin e zgjedhjeve në Shqipëri ku mazhoranca ka dominuar me 83 mandate. Gonzato shprehet se nuk i takon të flasë, por se ky rezultat e vë PS-në përpara përgjegjësisë për të përshpejtuar reformat dhe se nuk ka kujt t’ia hedhë fajin.
“Nuk më takon mua të bëj komente, por me këtë mandat të fortë, qeveria duhet të zbatojë ato reforma për të cilat është angazhuar dhe nuk ka kujt t’ia hedhë fajin. Përshpejtimi i këtyre reformave është i rëndësishëm, por kjo nuk duhet të ecë në kurriz të transparencës apo gjithëpërfshirjes. Të gjithë duhet të kenë mundësinë të japin këndvështrimet e tyre për mënyrën se si zbatohen standardet e BE-së”.
Nga ana tjetër është shprehur se një koment më të thelluar u takon ta bëjnë ekspertët nga OSBE/ODHIR të cilët kanë hartuar një raport kritik për zgjedhjet parlamentare.
“Ne mbështetemi në vlerësimin që bën OSBE/ODIHR sepse ata janë ekspertët. Pjesa administrative ishte aspekt që meriton lëvdata, por raporti është edhe kritik: flet për pabarazi, përdorimin e gjerë të burimeve administrative, flet për presione ndaj zgjedhësve. Shqipëria ka një mazhorancë të qartë dhe duhet të vijojë me reformat dhe duhet të trajtojë të gjitha rekomandimet e ODIHR-it me një reformë zgjedhore”.- vijoi ambasadori.
Më tej, Gonzato tha se ky dominim në mandate i partisë në pushtet mund të lexohet si mesazh se shqiptarët duan të integrohen në BE.
“Shqipëria është angazhuar tërësisht që të bëhet anëtar i BE-së dhe që të bëhesh duhet të respektosh disa vlera e parime. Unë do të flas kur të mendoj që disa reforma nuk po ecin siç duhet. Këtë votë e shoh edhe si mesazh që shqiptarët duan të integrohen në BE.
Bashkimi Europian e sheh rezultatin e zgjedhjeve si diçka pozitive, si sinjal që neve na duhet të mbajmë premtimet tona kundrejt Shqipërisë.- përfundoi ai.







