Në gjykatën Kushtetuese u shqyrtua sot padia e bërë nga Partia Demokratike sa i takon rrëzimit në Kuvend kërkesës për të dërguar në “Kushtetuese” mandatin e Olta Xhaçkës si deputete.
Në seancën publike që u mbajt, i pranishëm ishte edhe kreu i grupit parlamentar të PD, Gazment Bardhi u shpreh se Kuvendi kërkon të dalë sipër një vendimi të Gjykatës Kushtetuese i cili vlerësoi papajtueshmërinë e mandatit të Xhaçkës dhe shtoi se deputetët demokratë e kishin bërë detyrën e tyre duke e sjellë çështjen në GJK.
“Dy vite më parë grupi ynë parlamentar iu drejtua Kuvendit me vlerësimin e papajtueshmërisë për mandatin e Olta Xhaçkës si deputete. Për herë të parë në historinë e Kuvendit, një vendim i marrë nga Gjykata Kushtetuese është sfiduar nga Kuvendi përmes shpalljes së vetes si sovran ndaj vendimeve të GJK. Grupi ynë ishte para dy sfidave nëse duhet të vinte në GJK ose t’ja linte turpin mazhorancës. Do të ishte një humbje kohe t’ju shpjegonim juve vendimin që vetë ju e keni marrë. Ëshë në dorën tuaj të mbroni autoritetin dhe dinjitetin e kësaj godine. Ne e kemi bërë detyrën tonë si deputetë të pakicës parlamentare”- tha Bardhi.
Më 11 prill, me 39 vota pro dhe 72 kundër, u rrëzua kërkesa e opozitës që mandati i deputetes Olta Xhaçka të shqyrtohet nga Gjykata Kushtetuese lidhur me kushtetutshmërinë. Opozita kërkoi dërgimin e mandatit të Xhaçkës në Kushtetuese që në vjeshtën e vitit 2022, pasi e akuzon se ka konflikt interesi përmes bashkëshortit të saj si investitor strategjik. Në janarin e vitit 2023 Gjykata Kushtetuese vendosi që parlamenti duhet të çojë çdo kërkesë për mandatin e deputetëve në këtë gjykatë. Pavarësisht kësaj, socialistët votuan kundër dërgimit të mandatit të Xhaçkës në Kushtetuese. Versus.al
