Komisioni i Venecias ka marrë kërkesën e Kuvendit të Shqipërisë, për të dhënë një mendim në lidhje me çështjen e mandatit të Olta Xhaçkës dhe vendimit të marrë nga Gjykata Kushtetuese.
Sipas njoftimit për shtyp të bërë të ditur nga Komisioni i Venecias, kërkesa është pranuar më 13 shtator me dërguese kryetaren e Kuvendit të Shqipërisë, Elisa Spiropali.
Në këtë kërkesë kryeparlamentarja "kërkoi një opinion të Komisionit të Venecias për marrëdhëniet ndërmjet demokracisë përfaqësuese parlamentare dhe vendimeve detyruese të Gjykatës Kushtetuese në kuadër të rolit të Kuvendit në shqyrtimin e mocioneve për papajtueshmërinë e mandatit të deputetit", thuhet në njoftim.
Sipas të njëjtit njoftim, Komisioni i Venecias do ta shqyrtojë këtë kërkesë gjatë sesionit të 141 që do të zhvillohet në datat 6-7 dhjetor 2024.
Në fillim të këtij sesioni parlamentar në Shqipëri, kuvendi i Shqipërisë diskutoi 14 orë në seancë parlamentare, dhe mesnatën e 13 shtatorit deputetët u thirrën për të votuar mbi kolegen e tyre Olta Xhaçka.
Kësaj here socialistët nuk votuan kundër, si dy herët e tjera, por pjesa më e madhe e tyre abstenuan, duke rrëzuar kështu për herë të dytë vendimin e Kushtetueses.
Pas kësaj, Kuvendi iu drejtua zyrtarisht Komisionit të Venecias për t’i marrë një opinion nëse Gjykata Kushtetuese mund të imponojë një deputet se si duhet të votojë.
