Ish-presidenti i Koovës, Behgjet Pacolli i cili njihet si biznesmen i fuqishëm në Ballkan ka denoncuar një skemë kriminale që sipas tij, persona të caktuar po e përdorin për të përfituar para në emrin e tij.
Ai tha se një person në Tiranë, ka imituar numrin e tij të telefonit në Ëhatsapp dhe ka përdorur foton e tij duke kontaktuar miqtë e tij të cilëve u ka kërkuar para me justifikimin se i duheshin urgjentisht.
Pacolli u bëri thirrje miqve të tij që të mos mashtrohen pasi ai nuk kërkon para nga askush. Ndërsa tha se raste të tilla duhet të denoncohen në polici.
Postimi i plotë:
Kohët e fundit janë shfaqur grupe kriminale të sofistikuara që po përdorin metoda të ndryshme për të mashtruar njerëzit dhe për të përfituar shuma të mëdha parash.
Fatkeqësisht, një rast i tillë ka ndodhur edhe me identitetin tim, në Shqipëri.
Një person i panjohur ka përdorur fotografinë time dhe, përmes teknologjisë digjitale, ka imituar edhe numrin tim të telefonit. Ka kontaktuar disa nga miqtë e mi përmes ËhatsApp-it, duke kërkuar para me justifikimin se më duheshin urgjentisht në Tiranë, dhe se do t’i ktheja ditën tjetër.
Mesazhet ishin të tipit:
“Tani urgjentisht më nevojiten para në Tiranë. Po e dërgoj dikë t’i marrë, dhe nesër vij e ua kthej.”
Këto kërkesa kanë qenë për shuma të mëdha – nga 10 deri në 95.000 euro.
Fatkeqësisht, disa persona kanë besuar dhe kanë dërguar para.
Vetëm më 1 prill, një mik i vëmendshëm kuptoi se mënyra e të shkruarit nuk ishte e imja dhe më njoftoi menjëherë.
JU LUTEM: MOS U MASHTRONI!
Unë nuk kërkoj para nga askush.
Nëse merrni ndonjë mesazh të dyshimtë në emrin tim, mos reagoni – por njoftoni menjëherë policinë ose më informoni mua direkt.
Të gjithë së bashku mund t’u kundërvihemi këtyre mashtruesve pa skrupuj.
Ju kërkoj ndjesë për shqetësimin dhe ju falënderoj për mirëkuptimin dhe besimin! Versus.al
