Për herë të parë, deputetët shqiptarë do të protestojnë para një institucioni të Bashkimit Europian.
Ashtu siç e kishin paralajmëruar më herët, 30 deputetë të Partisë Demokratike më 23 tetor do të mblidhen para dyerve të Parlamentit Europian për të protestuar mbi situatën ku ndodhet opozita në vend dhe përjashtimin e tyre nga Kuvendi pas nisjes së aksionit të dhunshëm që e kanë quajtur “mosbindje civile”.
Data e zgjedhur nuk ka qenë e rastësishme pasi në këtë datë, Parlamenti Europian zhvillon seancë plenare.
Demokratët kërkojnë sensibilizimin e eurodeputetëve të PE me situatën ku ndodhen aktualisht ata, të përjashtuar nga Kuvendi, me kryedemokratin Sali Berisha në arrest shtëpie dhe së fundmi edhe deputetin Ervin Salianji të dënuar me 1 vit burg për kallëzim të rremë në dosjen Babale.
Opozita prej 30 shtatorit kur në seancë plenare, kryeparlamentarja Elisa Spiropali lexoi shkresën e prokurorisë për arrestimin e Salianjit, i është rikthyer bojkotit të komisioneve parlamentare dhe të dhunës në Kuvend. Në të njëjtën seancë, deputetët opozitarë i vunë flakën karrigeve të Kuvendit, duke shkaktuar një dëm prej 764 mijë lekësh që do paguhet nga 4 deputetët përgjegjës.
Për aksionin e dhunshëm, u përjashtuan me muaj 23 deputetë të opozitës dhe me vetëm 10 ditë Edi Paloka. Për këtë përjashtim që ua pamundëson pjesëmarrjen në jetën parlamentare. Me protestën e 7 tetorit, opozita tha se ka nisur 'mosbindjen civile', për të cilën kryedemokrati Sali Berisha u shpreh se nuk do të ketë ndalim deri në krijimin e një qeverie teknike. Versus.al
