E ngarkuara me punë e SHBA në Tiranë, Nancy VanHorn ka dhënë mesazhe të forta gjatë fjalës që mbajti në një ceremoni ku u diplomuan 26 punonjës të rinj të Agjencisë së Mbikëqyrjes Policore, të trajnuar nga Amerikanët.
VonHorn dha mesazhe të rëndësishme edhe sa i përket bashkëpunimit të AMP-së me SPAK, apo edhe masakrën e pak ditëve më parë në Shkodër, ku sipas saj, u vranë qytetarë të pafajshëm.
“Vetëm javën e kaluar, kalimtarë të pafajshëm humbën jetën në Shkodër. Kështu që, kostoja e krimit nuk është vetëm humbje në të ardhura apo mundësi, por edhe në jetë njerëzore shqiptare. Puna juaj mbron bashkëqytetarët tuaj në mënyra shumë konkrete.
Ju jeni absolutisht vendimtarë për funksionimin e Policisë së Shtetit. AMP-ja ndërton dhe ruan respekt të ndërsjellë mes Policisë së Shtetit dhe publikut shqiptar.
Çdo herë që kryeni një hetim të drejtë dhe transparent për akuzat për korrupsion, çdo herë që arrestoni dhe ndiqni penalisht një oficer që nuk ka arritur ta mbajë veten në përputhje standardeve më të larta dhe çdo herë i përgjigjeni shpejt dhe i merrni seriozisht ankesat e publikut, ju rritni besimin e publikut jo vetëm te Policia e Shtetit, por edhe te agjencia tuaj.
Dhe dua të them, e pranoj se kjo nuk është një detyrë e lehtë.
Policimi i policisë është tepër i ndërlikuar.
Si rojtarë të ligjzbatimit, ju mbështesni parimet që janë themelore për shtetin e së drejtës në Shqipëri dhe populli shqiptar mbështetet te ju. Ata vërtet mbështeten te ju për të kryer gjetjen e paanshme të fakteve, themelin e të gjitha hetimeve për të vërtetën.
Dhe sa herë kryeni detyrën tuaj për të cilën jeni betuar përpara popullit shqiptar, po rritni besimin e tij në një sistem drejtësie të drejtë, të ndershëm dhe që jep llogari.
Nën drejtimin e ministrit tuaj dhe drejtorit të përgjithshëm, ju keni dëshmuar zotësi dhe aftësi për të punuar në bashkëpunim me organizata të tjera të drejtësisë.
Dhe dua të ndaj me ju se kur jam takuar me z. Dumani, të cilin e kam takuar në disa raste, ai vë në dukje punën që bëni për të zbatuar këto standarde integriteti si vendimtare për punën që ai dhe kolegët e tij në SPAK kryejnë.
Nuk ka mundësi që një pjesë e vetme e institucioneve të drejtësisë të ketë sukses pa bashkëpunimin dhe bashkëveprimin e të gjithë sistemit”, theksoi e ngarkuara e SHBA në Tiranë, Nancy VanHorn.
