Ka përfunduar pas 3 orësh protestë e bllokim rrugësh, mosbindja civile e opozitës.
Nga Kthesa e Kamzës deputeti Flamur Noka, akuzoi policinë se tentoi të intimidojë opozitën, por mosbindja civile sipas tij, e cila do të vijojë, dha frytet e veta.
“Qytetarët bënë gjithçka që të shmangin përplasjen me forcat e policisë. Ishte një ditë e zezë e bandave të pushtetit. Të tmerruar ata kanë sjellë narkopolicinë në çdo kryqëzim që të intimidojnë opozitën, por kanë treguar vetëm se janë mekanikë dhe mosbindja civile ka filluar të japë frytet e veta. E shmangën sot po jo gjithmonë. Mosbindja civile do të vazhdojë, do t’ju njoftojmë për hapat e radhës. Të jeni të sigurt që kthim pas nuk ka. Qëndresa dhe rezistenca do të japë frytet e saj”, tha Noka.
Sekretari i Partisë së Lirisë Tedi Blushi, në mbyllje të protestës së opozitës te Kthesa e Kamzës tha se në këtë vend u rrëmbye Ilir Meta. Por sot sipas tij mijëra shqiptarë i dhanë një mesazh të qartë qeverisë.
“Nga ky vend ku vetëm një javë më parë u rrëmbye presidenti i PL-së mijëra shqiptarë i dhanë një mesazh të qartë këtij narkoshteti qëndron në këmbë falë një narko drejtësie se fundi i tij është shumë afër sot shqiptarët e ndershëm me opozitën në ballë treguan se ata janë zot të fateve të vendit dhe së ardhmes së Shqipërisë. Kjo përballje do të përshkallëzohet edhe më tej deri në çrrënjosjen e këtij regjimi kriminal që sot ka ndaluar politikisht dy drejtuesit kryesorë të opozitës, por ta harrojë se mund të marrë peng një popull të tërë. Fundi i këtij regjimi dhe përballja do të jetë pa mëshirë dhe dhëmb për dhëmb”.
