“Qeveri teknike”, kjo ishte kryetema e diskursit politik të përdorur nga kryedemokrati Sali Berisha gjatë thirrjes së tij për qytetarët të cilëve u kërkoi të jenë pjesë e protestës kombëtare të thirrur më 7 tetor në orën 18:00.
Sa i takon planit për bllokimin e rrugëve të Tiranës, Berisha tha se skenarin e protestës, mediat do e marrin vesh më 7 tetor.
“Skenarin e saktë do e merrni vesh ditën e hënë në orën 18:00. Por në tërësi është konceptuar si një protestë në të cilën qytetarët me protestën e tyre i tregojnë regjimit se janë zotër të këtij vendi”- tha Berisha.
Ai tha se kërkesa e opozitës për qeveri teknike është e panegociueshme pasi sipas tij vetëm në këtë mënyrë mund të ketë një shpresë për zgjedhje të lira. Për krijimin e qeverive teknike para zgjedhjeve, kryedemokrati mori si shembull Greqinë.
“Nuk besoj se ka shqiptar që beson se Edi Rama lejon zgjedhje të lira. Ai ka krijuar një makineri gjigande të blerjes së votave dhe të trafikantëve që frikësojnë qytetarët e patronazhistët që kryejnë krime elektorale. Kjo është kauzë për të cilën ia vlen të sakrifikosh me të gjithë forcën. Ju garantoj se nuk heqim dorë nga kërkesa për qeveri teknike. E kemi mision kryesor. Një opozitë nuk merr dot përsipër mbrojtjen e votës me armë, por me metoda demokratike. Ne garantojmë se pa qeveri teknike, vota e qytetarëve, ka vdekur para se të hyjë në kuti. Ndaj le të shkojmë në qeveri teknike siç shkon Greqia çdo zgjedhje dhe disa vende të tjera që i kanë harruar problemet elektorale”- theksoi kreu i PD.
Ndër detajet që zbuloi, Berisha bëri me dije se nuk do të ketë fjalime të politikanëve por, fjala do i lihet qytetarëve të cilët do të flasin me veprimet e tyre. I pyetur nga gazetarët, nëse ekzistonte mundësia e një ’21 janari’ të dytë, Berisha e hodhi poshtë idenë duke thënë se bëhet fjalë për përpjekje që qytetarët të kenë mundësi të marrin pjesë në zgjedhje të lira.
“21 janari u ndërtua nga një falsifikim dhe etje gjakësore për pushtet të Edi Ramës dhe bandës së tij, 7 tetori është ditë për të hapur dyert për shqiptarët për zgjedhje të lira e të ndershme”- shtoi Berisha.
Ndërkohë, për pyetjen nëse do ketë protestë para SPAK, Berisha nuk pati një përgjigje të prerë, por nuk u kursye në akuzat ndaj Prokurorisë së Posaçme. Versus.al
