Me kërkesë të dy anëtarëve të zgjedhur nga opozita, Komisioni Rregullator u mblodh në mënyrë urgjente për të shqyrtuar propozimin e demokratëve që shtynte me 5 ditë afatin e e regjistrimit të diasporës.
Por, Komisioni Rregullator refuzoi me shumicë votash kërkesën për zgjatjen e afatit të regjistrimit të diasporës, duke votuar 3 pro dhe 2 kundër.
Kjo kërkesë ishte paraqitur nga dy anëtarët e propozuar nga opozita, Muharrem Çakaj dhe Helga Vukaj, të cilët sugjeruan që afati për regjistrimin e emigrantëve të shtyhej për pesë ditë të tjera.
Argumentet e opozitareve nuk binden anëtarët e propozuar nga mazhoranca të cilët e rrëzuan me shumicë votash.
Mungesa e dakordësisë dhe kushtet ndaj palëve i prenë shpresën e riaplikimit edhe 42 mijë emigrantëve, te cilëve i është refuzuar regjistrimi, për shkak të pasaktësive në aplikim.
Megjithatë, Komisioni Rregullator vendosi të mos e pranojë këtë kërkesë, duke mbajtur në fuqi afatin e mëparshëm të regjistrimit, pa mundësinë për shtyrje.
Ky vendim ka shkaktuar debate, pasi opozita ka shprehur shqetësim se emigrantët mund ta kenë të pamundur për të përfunduar regjistrimin brenda afatit të caktuar, ndërsa mbështetësit e vendimit të Komisionit Rregullator argumentuan se afatet janë të qarta dhe se shtyrja e regjistrimit mund të shkaktonte komplikime të tjera organizative.
