Debati që supozohej të ishte një përplasje idesh dhe alternativash për t’i dhuruar Shqipërisë alternativa të reja politike përveç partive të vjetra, mbrëmë në “Opinion” u kthye në një përplasje mes moderatorit Blendi Fevziu dhe kreut të Lëvizjes “Bashkë”, Arlind Qori.
Përplasja nisi pasi ky i fundit pati një ankesë për faktin se nuk ishte ftuar më shpesh në emisionet e Opinion, ndryshe nga politikanët e vjetër, ndërsa Fevziu iu përgjigj se as ministra e deputetë nuk kishin pasur ftesa për shkak se nuk kanë shikueshmëri.
Fevziu u shpreh se “s’ka Perëndi në botë të më diktojë mua kë do marr e kë do heq” në lidhje me të ftuarit në emisionin e tij.
Më tej, Qori i citoi një deklaratë të Arian Çanit i cili pati deklaruar më herët se gjatë kohës që kishte emisionin “Zonë e Lirë” nuk e linin ta ftonte Qorin.
Pjesë nga përplasja:
Qori: Po të citoj ish-kolegun tënd, që përfaqësonte institucionin ku punonte
Fevziu: Po ç’punë ka institucioni, unë jam këtu përballë ti më thua institucioni.
Qori: E mban mend reportazhin e janarit 2020 për minierën e Bulqizës? Në kulmin e grevës së minatorës..
Fevziu: Edhe…
Qori: Është bërë një reportazh lajm me lule ‘është parajsë miniera’. Si qenka kjo, a e di sa njerëz vdesin çdo ditë? E di sesa paguhen.
Fevziu: E di çfarë po më thoshin tani, se nuk doja ta lexoja… nga zyra e shtypit e Balfin më shkruhet se Arlind Qori paguhet nga konkurrentët tanë.
Qori: Arlind Qori ka një makinë 4 mijë euro, kam 14 vite jetë publike, më ke në urban përditë.
Fevziu: Ëë shiheni si nxehet tani për këtë deklaratë. Versus.al
