Komisioni Rregullator i KQZ-së do të vendosë sot vendimin përfundimtar mbi rezultatin e zgjedhjeve parlamentare të 11 majit.
Mbledhja pritet të nisë në orën 11:30, ku do të miratohet numri i votave, i mandateve dhe listat emërore të deputetëve për çdo subjekt politik në rang kombëtar.
Pas këtij hapi, Presidenti i Republikës, Bajram Begaj, ka afat dhjetë ditë për të dekretuar fillimin e punimeve të legjislaturës së 11-të. Mbledhja e parë e Kuvendit do të shënojë nisjen zyrtare të mandatit të ri katërvjeçar.
Rezultati
Zgjedhjet e 11 majit prodhuan një fitore të thellë për Partinë Socialiste, e cila siguroi 83 mandate. Në krahun tjetër, Partia Demokratike–Aleanca për Shqipërinë Madhështore mori 50 vende në Kuvend. Partia Socialdemokrate do të përfaqësohet me tre deputetë, subjekti politik “Mundësia” me dy, ndërsa koalicioni 'Lëvizja Bashkë dhe Nisma Shqipëria Bëhet' me një mandat.
Kontestimet dhe polemikat
Procesi zgjedhor u shoqërua me akuza të forta për manipulim nga opozita, e cila denoncoi “vjedhjen e votës” nga mazhoranca. Megjithatë, rinumërimet në Tiranë nxorën në pah vetëm gabime njerëzore, pa ndikuar rezultatin përfundimtar. Në qarkun e Fierit, një mandat i fituar fillimisht nga Maldrita Bardhos me vetëm 10 vota diferencë, iu la Zegjine Caushit, pas refuzimit të vetë Bardhos.
Në Durrës, rinumërimi i kutive nuk i dha Aulon Kalasë mandatin e shumëdebatuar që pritej t’i shkonte ish-prokurorit Arjan Ndoja. Ndërkohë, brenda koalicionit “Nisma Shqipëria Bëhet”, mandati i vetëm u kthye në mollë sherri mes Adriatik Lapajt dhe Endri Shabanit. Pas një beteje ligjore, Kolegji Zgjedhor ia dha mandatin Anisa Dajkos, duke lënë jashtë Kuvendit Lapajn.
Çfarë pritet më pas
Me mbylljen e procedurave formale, politika shqiptare hyn në një fazë të re. Socialistët do të nisin legjislaturën e radhës me shumicën absolute, ndërsa opozita do të përpiqet të konsolidohet në rolin e saj pas një fushate të tensionuar. Pritet që mbledhja e parë e Kuvendit të ri të vendosë për katër viteve të ardhshme të jetës politike në vend./Versus.al
