Tiranë- 11 parti politike janë regjistruar si pjesëmarrëse në zgjedhjet e parakohshme që do të zhvillohen më 4 gusht për bashkinë e Himarës.
Gjatë një séance të zhvilluar paraditen e sotme, Komisioni Qendror i Zgjedhjeve miratoi listën me subjektet politike që do të garojnë në zgjedhjet që zhvillohen edhe për këshillin bashkiak dhe jo vetëm për kryebashkiakun.
“Miratojmë regjistrimin si subjekt zgjedhor të PS, PDK, PR, FRD, PBDNJ, PL, Balli Kombëtar, PD, PAA, Balli Kombëtar Demokrat, PBD”- u shpreh kryekomisioneri zgjedhor, Ilirjan Celibashi gjatë seancës së mbajtur mëngjesin e ditës së sotme.
Për postin e kreut të bashkisë së Himarës, garojnë Vangjel Tavo nga PS dhe Petro Gjikuria nga PBDNJ. Ndryshe nga sa pritej, opozita duket se nuk ka pasur konsensus për kandidaturën e Gjikurisë pasi as kryedemokrati Sali Berisha dhe as kreu i PL Ilir Meta nuk kanë bërë asnjë deklaratë në mbështetje të tij. Madje dega e PD-së në Himarë la të kuptohej se nuk kishte pasur konsultime me PBDNJ sa i takon kandidaturës së biznesmenit shqiptaro-amerikan në zgjedhjet e parakohshme.
Të drejtën e votës në Himarë e kanë 23 mijë e 74 persona, ndërsa KQZ miratoi numrin e fletëve të votimit me 2% më shumë sesa numri i personave me të drejtë vote. Numërimi i votave do të bëhet në sallën e këshillit bashkiak. Versus.al
