Partia Socialiste dorëzoi dje në Kuvend projektligjin për ndryshimet në Kodin Zgjedhor ku parashikohej edhe mënyra sesi do të bëhej i mundur votimi i emigrantëve shqiptarë që jetojnë jashtë vendit, në zgjedhjet parlamentare të vitit 2025.
Në një tryezë diskutimi të përbashkët të mbajtur me KQZ për zgjedhjet e 2025-ës, kryetari i prezencës së OSBE në Tiranë, Michel Tarran ftoi palët që të bashkëpunojnë për të pasur konsensus në mënyrë që të realizohet vota e emigrantëve shqiptarë që jetojnë jashtë vendit, detyrim për të cilin është shprehur më herët edhe Gjykata Kushtetuese.
“Sfidë e pazgjidhur ende zbatimi i vendimit të Gjykatës Kushtetuese duke përfshirë çështjen e votimit nga jashtë vendit. Secili shtet duhet të zbatojë atë model që i përshtatet me mirë sipas kontekstit. Çdo vendim, duhet të jetë prej konsensusit të të gjithëve. Ky konsensus duhet të bazohet në bashkëpunim dhe një qasje e tillë do të çonte në votimin nga jashtë vendit. OSBE është e angazhuar për të përmirësuar administrimin e zgjedhjeve dhe proceset zgjedhore. Ju ftoj ta shihni prezencën OSBE-së. Kur ka vullnet ka edhe zgjidhje”- tha Tarran.
Menjëherë pas fjalës së tij, përfaqësuesit e PS dhe PD në grupin e dialogut pranuan dështimin e negociatave për dakordësi mes tyre ndërsa shpejtuan për të fajësuar njëri-tjetrin. Përfaqësuesja e PS, Blerina Gjylameti pranoi dështimin e grupit të dialogut ndërsa tha se PS ka vullnet për të çuar përpara Reformën Zgjedhore.
“Grupi i dialogut ka dështuar për konsensus, secila palë mund të flasë për arsyet pse dështoi, por nga ana jone kemi treguar vullnet që jemi të gatshëm për te adresuar rekomandimet e Gjykatës Kushtetuese dhe OSBE-së, por do presim deri fundit. Presim deri moment të fundit. Jemi të gatshëm që diaspora të votojë. Regjistrimi i tyre të jetë pranë KQZ. Së dyti për ta shtrirë procesin dhe numërimin elektronik në pesë qarqe. Teknologjia eliminon një se problematikat. Jam e bindur si përfaqësuese e PS që palët të ulen me tryeze. Shpresoj që nga kolegët e opozitës ta kemi te njëjtën gjë te mos ngrjemë artifica ligjore për votimin elektronik” tha Gjylameti.
Nga ana tjetër, Bylykbashi u shpreh se me propozimin e bërë nga PS, vota e emigrantëve bllokohet pasi u mundësohet e drejta vetëm atyre të cilëve mund të kenë një adresë të ligjshme, pa marrë parasysh shqiptarët që jetojnë jashtë de facto.
“Vota e emigrantëve vritet në parim duke kërkuar njësoj si më përpara që emigrantët të votojnë vetëm nëse kanë një adresë të ligjshme. Ata qindra mijëra emigrantë që kanë ikur vitet e fundit, që e vërteton edhe censusi i manipuluar, nuk do të kenë të drejtën e votes”- tha Bylykbashi.
Propozimi i PS për ndryshimet në Kodin Zgjedhor pritet të votohen në seancën plenare të ditës së enjte, 11 korrik. Versus.al
