Policia e Kurbinit ka finalizuar me sukses operacionin e koduar “Violent”, pas një rasti të rëndë dhune në familje që vuri në alarm autoritetet.
Sipas Policisë, R. Gj., 29 vjeç, sulmoi fizikisht babain e tij K. Gj., 66 vjeç, dhe më pas u largua me shpejtësi nga banesa, duke u konsideruar person me rrezikshmëri të lartë, për shkak edhe të precedentëve penalë, pasi më herët ka qenë i dënuar për dhunë në familje.
Menjëherë pas marrjes së njoftimit, shërbimet e Komisariatit të Policisë Kurbin shkuan në vendngjarje dhe nisën kërkimet. Në vlerësim të situatës dhe të sjelljes së dhunshme të të riut, Policia kërkoi mbështetjen e Forcës Kombëtare të Sigurisë.
Pas disa orësh kontrolle dhe veprimesh të koordinuara mes Policisë së Kurbinit dhe Njësisë së FKS në Tiranë, 29-vjeçari u lokalizua dhe u arrestua.
Gjatë kontrollit në banesën e tij, efektivët gjetën dhe sekuestruan 105 gramë kanabis, duke shtuar kështu akuzat ndaj tij.
Hetimet vazhdojnë për dokumentimin e plotë të ngjarjes.
