Kupa e Botës 2026 do të zhvillohet për herë të parë në tre shtete: SHBA, Kanada dhe Meksikë, nga 11 qershori deri më 19 korrik 2026.
Për qytetarët shqiptarë që ëndërrojnë të ndjekin ndeshjet në kontinentin amerikan, sidomos në rast se Kombëtarja kuqezi kualifikohet, Ambasada e SHBA në Tiranë ka bërë thirrje për aplikim të menjëhershëm për viza.
“Shtetet e Bashkuara po ofrojnë udhëtime të sigurta dhe të mbrojtura për sportdashësit ndërkombëtarë që duan të vizitojnë SHBA për Kupën e Botës FIFA 26™, dhe jemi të përgatitur për të përpunuar aplikimet për vizat e vizitorëve. I inkurajojmë të gjithë që kanë nevojë për vizë të aplikojnë sa më parë”, deklaroi ambasada.
Kualifikimi historik i Shqipërisë në fazën play-off të Botërorit u sigurua pas fitores në transfertë ndaj Andorrës, në kombinim me humbjen 2-0 të Serbisë në fushën e Anglisë. Ky është një moment pa precedent në historinë e Kombëtares shqiptare.
