Të shtunën shënohen dy vjet nga vrasja e rëndë e Liridona Ademajt, ngjarje që tronditi opinionin publik dhe la plagë të hapura në familjen e saj. Ajo u vra para syve të fëmijëve të saj në natën e 29 nëntorit 2023, një akt që vazhdon të jetë një plagë e thellë për të afërmit.
Në bankën e të akuzuarve për këtë krim qëndrojnë ish-bashkëshorti i saj, Naim Murseli, si dhe Granit Plava dhe Kushtrim Kokalla. Familja Ademaj ka kërkuar dënim me burgim të përjetshëm për të tre të akuzuarit.
Dokumenti i siguruar nga gazetarja e Klan Kosovës, Qëndresa Tërshani, tregon se vrasja nuk ishte e rastësishme, por ishte planifikuar me kujdes. Sipas dëshmisë së Granit Plavës, Naim Murseli kishte përgatitur armën me 5 fishekë, duke kthyer natën e 29 nëntorit në një skenë të paramenduar.
Në dëshminë e tij, Plava ka treguar detaje të tronditshme:
“Dy ditë më parë, përmes Kushtrimit, u takova me Naimin. Dalim natën dhe pimë. Ditën kritike, u zgjova në mëngjes dhe rreth orës 9:30-10:00, Naimi erdhi më mori dhe u nisëm për në Prishtinë. Ai ecte përpara me makinën, unë për pas. Ndaluam te pompa dhe aty më la armën me 5 fishekë në shanzher dhe 15 fishekë të tjera. Pastaj u nisëm për në Prishtinë, ndërkohë më dha një kafe dhe ndjeva një energji të madhe.”
Plava shtoi se në momentet vendimtare, Naimi i kishte thënë: “Gjuaj, gjuaj.”
“Kur kemi qenë te kafja në Graçanicë, ai u largua me familjen e vet. Unë qëndrova aty dhe prisja instruksionet e tij. Më shkroi duke më thënë ‘po qohmi?’. Kur dolëm prej kafes, unë e kisha makinën dhe e ndjeka deri te shtëpia e Naimit. Kur u ndal, ai hapi xhamin dhe më tha: ‘Gjuaj, gjuaj’. Unë u nisa drejt, por pas rreth një ore u ktheva dhe fleva. Të nesërmen mora vesh se Liridona kishte ndërruar jetë. Pas dy ditësh erdhi policia dhe më arrestoi,” ka rrëfyer Plava.
Ky dokument dhe dëshmia e Plavës theksojnë qartë se vrasja e Liridona Ademajt ishte e paramenduar dhe se të tre të akuzuarit kishin një rol aktiv në planifikimin dhe ekzekutimin e krimit.
