Lezhë- Një shkollë 9 vjeçare në Gjadër është grabitur gjatë mbrëmjes së djeshme.
Sipas Repurt Tv, mësohet se grabitësit kanë thyer xhamat dhe kanë arritur të marrin regjistrat e klasave të ndryshme, një shumë parash, gjithashtu dhe kamerat me serverin e pamjeve filmike.
Ndërsa në një reagim të mëvonshëm të policisë, thuhet se është konstatuar vetëm xhami i thyer, duke mohuar të ketë pasur grabitje të sendeve materiale apo shumave të parave.
"Rreth orës 08:00, jemi njoftuar nga personeli i shkollës 9-vjeçare "Gjovalin Gjadri" në Gjadër, se kishin konstatuar xhamin e dritares së katit të dytë të thyer. Nga verifikimet e deritanishme ka rezultuar se në ambientet e brendshme të shkollës nuk ka hyrë asnjë person si dhe nuk është vjedhur apo dëmtuar asnjë material i brendshëm i shkollës"- njoftojnë blutë e qytetit.
Grupi hetimor po punon për zbardhjen e plotë të ngjarjes. Versus.al
