Ilir Proda është emëruar nga sot drejtor i ri i Përgjithshëm i Policisë së Shtetit. Lajmi u konfirmua nga ministri i Brendshëm Ervin Hoxha i cili bëri me dije se këshilli i ministrave kishte miratuar propozimin e tij gjatë mbledhjes së sotme.
“Me propozimin tim, qeveria miratoi Ilir Prodën si drejtor të përgjithshëm të policisë”- tha Hoxha.
I pyetur nga gazetarët për faktin se Ilir Proda ka qenë një prej zyrtarëve policorë që u ishte sekuestruar telefoni nga SPAK nën kuadër të hetimeve për dekonspirim të operacionit të goditjes ndaj klanit të Çopjas në Elbasan, Hoxha tha se është verifikuar pastërtia e figurës së tij.
"Të gjithë organet ligjzbatuese zbatuan në kohë rekord aktet verifikuese duke sjellë përgjigje po në kohë rekord çka solli verifikimin në kohë shumë të shpejtë të figurës së kandidatëve, ndaj ky proces konsiderohet transparent dhe drejtori i ri i policisë i ka kaluar etapat e verifikimit"- shtoi ministri.
Ndërsa menjëherë pas emërimit të Prodës, Hoxha bëri me dije se do të nisë procesi për emërimin e drejtorëve të policisë në rrethet e vendit. Ilir Proda kaloi të gjithë fazën e konkurrimit dhe u përzgjodh në fund nga anëtarët e komisionit të posaçëm të ministrisë.
Procesi i zgjedhjes së drejtorit të Përgjithshëm u zhvillua mes debateve ndërmjet deputetëve të opozitës dhe atyre të qeverisë. Në komisionin e Sigurisë, ditë më parë ish-deputeti Salianji (tashmë në burg) denonconte faktin që mes 15 aplikantëve për drejtor policie ishte edhe një personazh TikTok-u që kishte qenë më parë oficer, ndërsa tani ishte i shpallur në kërkim për krim kibernetik. Lista u pakësua shpejt, duke arritur në 11 kandidatë, 4 prej të cilëve ia dolën të ishin në fazën finale të konkurrimit, konkretisht: Ilir Proda, Neritan Nallbati, Skënder Hitaj dhe Altin Mena.
Karriera e Ilir Prodës ndër vite:
2002-2005 Akademia e Policisë
-Gusht 2005-Nëntor 2011 Komisariati Nr.3 Tiranë
-Nëntor 2011-Mars 2012 Komisariati Nr.4 Tiranë
-Mars 2012-Qershor 2013 Drejtoria e Përgjithshme e Policisë së shtetit, seksioni kundër krimeve ndaj jetës dhe lirisë së personit
-Qershor 2013- Tetor 2013 në Policinë e Lezhës
-Tetor2013- Dhjetor 2014 Shef Komisariati Nr.2 Tiranë
-Dhjetor 2014- Shkurt 2016 Shef Komisariati Bulqizë
-Shkurt 2016 – Maj 2017 Seksioni për hetimin e narkotikëve në Drejtorinë e Përgjithshme të Policisë së Shtetit
-Maj 2017- Korrik 2019 Drejtoria e Përgjithshme, Njësia për hetimin e krimeve kundër personit dhe pasurisë
-Korrik 2019 – Tetor 2021 Zv.Drejtor për hetimin e krimit në Korçë
-Tetor 2021- Mars 2023 Zv.Drejtor për hetimin e krimeve në Elbasan
-Mars 2023 Drejtor i Drejtorisë Vendore i Policisë së Elbasanit.
Në fillimin e muajit shtator, u bë me dije shkarkimi i Muhamet Rrumbullakut nga posti i drejtorit të Përgjithshëm të Policisë, pas ngjarjeve të shumta kriminale që ndodhën në vend gjatë muajit gusht, duke sjellë si domosdoshmëri një rrokadë në polici. Kështu u shpreh ministri i Brendshëm Ervin Hoxha i cili në deklaratën e tij të dhënë javë më parë, deklaroi se do të kishte proces kandidimi edhe për drejtorët e policisë nëpër qarqet e vendit. Versus.al
