Ministri i Brendshëm Ervin Hoxha mbajti sot një konferencë për gazetarët ku prezantoi zyrtarisht emrat e 12 drejtuesve policorë të qarqeve të vendit të cilëve u bëri thirrje që të kenë një qasje sa më aktive ndaj ankesave të qytetarëve dhe problemeve të ngritura nga media për sigurinë publike.
“Drejtuesit që marrin sot detyrën janë përzgjedhur për kompetencën dhe integritetin e figurës. Do të sigurojnë praninë e strukturave të rendit në çdo cep të Shqipërisë dhe reagim të shpejtë të ngjarjeve kriminale. Për shembull një nga ngjarjet si ajo e disa javëve më parë në Shkodër, duhet zbardhur sa më shpejt dhe autorët duhet të ndëshkohen sipas ligjit”- u shpreh ministri.
Ndër të tjera, sa i takon ndërtimeve pa leje, Hoxha bëri thirrje që efektivët e policisë të mos shqetësojnë qytetarët të cilët bëjnë riparime të vogla të çatisë apo të shkallëve, por të merren me shqetësime më të mëdha.
“Duhet të marrin fund shqetësimet e qytetarëve në fshat që ngacmohen nga punonjës policie të papërgjegjshëm për riparimin e një palë shkallëve apo çatisë, ndërkohë që policia e shtetit ka detyra të tjera, të përqendrohet në abuzimet e bëra në zonat turistike apo në zonat e mbrojtura apo lumenj. Ju kërkoj sot drejtuesve të rinj të kenë një qasje më proactive ndaj ankesave të qytetarëve por edhe ndaj atyre problemeve që media ngre”- shtoi Hoxha.
Drejtorët e policisë në 12 qarqe:
Tiranë- Elton Alushi i cili aktualisht është zv.drejtor i policisë në qarkun e Vlorës
Durrës- Vilson Bala, ish-shefi i Operacionales
Fier- Skënder Hitaj
Elbasan- Fatmir Hoxha
Shkodër- Fatmir Lleshi
Korçë- Erjo Ahmeti
Vlorë- Elidon Çela
Lezhë- Altin Mene
Gjirokastër- Altin Merizaj
Berat- Luigj Vathi
Kukës- Gentian Berberi
Dibër- Artion Duka
Procesi për përzgjedhjen e drejtuesve të rinj të policisë ka nisur prej disa javësh që pas miratimit të ligjit të ri për policinë. Në krye të Drejtorisë së Përgjithshme të policisë, u përzgjodh Ilir Proda pas një procesi ku kandiduan disa ish-drejtues apo drejtues aktualë të policisë. Versus.al
