SPAK ka dërguar për gjykim ish-kryebashkiakun e Bashkisë Pogradec, Eduart Kapri nën akuzë për “shpërdorim detyre”. Bashkë me Kaprin, SPAK ka dorëzuar edhe dosjen për 2 zyrtarët e bashkisë Pogradec, Besjan Meço e Besmira Niko.
Sipas SPAK, Eduart Kapri dhe 2 zyrtarët lejuan ndërtimin e pallatit 14 kate të vëllait të tij, Gëzim Kapri edhe pse i kishte mbaruar afati, e ndërsa specifikon se përtej kësaj shkeleje, u ndërtuan dhe 2 kate shtesë. Kjo pasi në lejen fillestare apartamenti ishte parashikuar që të ishte 12 kate.
Hetimi i ish kryebashkiakut vjen jo shumë kohë pasi ai u shpall i pafajshëm nga gjykata e Apelit Antikorrupsion, së bashku me vartës të hetuar për shkelje të barazisë në tendera.
Për këtë hetim Eduart Kapri mori dy pafajësi në të dyja shkallët e gjyqësorit e së bashku me të edhe një ish drejtoreshë dhe një ish koordinator, që SPAK i akuzoi për një tender për dru zjarri dhe për mbylljen e tre shkollave të miratuara si qendra votimi.
Në atë kohë ndaj Kaprit si edhe ndaj cdo zyrtari pati hetim pasuror, që u mbyll pa ngritje akuze dhe pa dyshime ndaj tij./Versus.al
