Prokuroria e Posaçme (SPAK) ka mbyllur hetimet dhe ka çuar për gjykim dosjen në ngarkim të Luis Çelës të akuzuar për kultivim droge dhe grup të strukturuar kriminal. 43 vjeçari është i përfshirë në një grup kriminal të trafikut të drogës të përbërë nga shqiptarë dhe grekë.
Hetimet janë bërë për t’u ardhur në ndihmë autoriteteve greke sa i takon kultivimit dhe magazinimit të drogës në zona të ndryshme të Messinias. Anëtarët e tjerë të grupit kriminal merreshin me trafikun e kokainës.
Ndërsa Luis Çela së bashku me anëtarë të tjerë të grupit shqiptaro-grek rezulton si autor i kultivimit të kanabisit me prejardhje holandeze. Kanabisi kultivohej në taraca të pastruara dhe të përshtatura. Në total nga pemët e kultivuara është rreth 250 kg kanabis që kapte vlerën deri në 75 mijë euro. Versus.al
