Tiranë- Me kërkesë të prokurorisë, gjykata konfiskoi pasuritë e Emiljan Burbës, të dënuarit në Itali me 21 vite burg për trafik droge.
Burba akuzohet se më 3 dhjetor tëvitit 2003 ka transportuar heroinë nga Shqipëria për në Itali. Sipas prokurorisë provohet se Burba nuk justifikon pasurinë e tij, e cila dyshohet se rrjedh nga veprimtaria kriminale.
Pavarësisht se kishte deklaruar se punonte si kamionist, hetimet e prokurorisë kanë zbuluar se Emiljan Burba nuk rezultonte i regjistruar në ndonjë zyrë punësimi në Itali. Duke rënë në dyshim për nivelin e jetesës së shtrenjtë që Burba dhe anëtarët e tij të familjes bëjnë, gjykata ka vendosur sekuestrimin e pasurive të tij dhe të familjarëve.
Janë konfiskuar 2 resorte në Delvinë dhe Vergo të Vlorës të cilat së bashku kapin vlerën e 3 milionë euro, pasuri që dyshohet se është ndërtuar nëpërmjet trafikut të drogës nga Burba gjatë viteve 2003-2006. Pasuritë e konfiskuara i kalojnë shtetit shqiptar.
Emiljano Burba është një emër që njihet dhe në botën e krimit shqiptar. 54-vjeçari njihet si mik i Aldo Bares, ish-kreut të bandës së Lushnjes. Ai u arrestua më 22 prill të vitit 2014 nga autoritetet shqiptare me qëllim ekstradimin e tij në Itali. Pas një procesi gjyqësor atje në lidhje me trafikun e drogës, Burba u dënua me 21 vite burg. Versus.al
