Shtetet e Bashkuara të Amerikës po rishikojnë ndihmën e tyre financiare për vendet e huaja, përfshirë Shqipërinë, në kuadër të politikave të reja të administratës amerikane, duke pezulluar fondet. Ky zhvillim vjen pas një periudhe gjatë së cilës SHBA ka qenë një nga donatorët kryesorë për forcimin e institucioneve demokratike dhe zhvillimin ekonomik të vendit tonë.
Sipas të dhënave të fundit, në vitin 2023, Shqipëria ka përfituar 39 milionë dollarë ndihmë financiare nga SHBA, të shpërndara në disa sektorë kryesorë:
20 milionë dollarë ishin të destinuara për paqen dhe sigurinë, duke mbështetur institucionet e rendit dhe forcat e sigurisë.
12.8 milionë dollarë shkuan për forcimin e demokracisë dhe të drejtave të njeriut, një angazhim i vazhdueshëm për të mbështetur reformat dhe qeverisjen e mirë.
3.5 milionë dollarë u dedikuan për ndihmën humanitare, për të përballuar situatat emergjente dhe grupet në nevojë.
2.7 milionë dollarë u investuan në arsimin dhe shërbimet sociale, për të përmirësuar cilësinë e edukimit dhe aksesin në shërbime bazë.
Pezullimi apo reduktimi i mundshëm i këtyre fondeve mund të ndikojë drejtpërdrejt në reformat që Shqipëria ka ndërmarrë në drejtësi, siguri dhe zhvillimin ekonomik. Analistët theksojnë se një ndryshim i politikës amerikane mund të nxisë qeverinë shqiptare të kërkojë burime alternative financimi, për të vijuar me projektet strategjike në vend.
Megjithatë, mbetet për t’u parë se si do të zhvillohet kjo situatë dhe nëse administrata e re amerikane do të vendosë të rikthejë ose ristrukturojë format e ndihmës për Shqipërinë. /Versus.al/
