Tiranë- Fredi Keta, i shpallur në kërkim si pjesë e grupit prej 7 personash që morën peng Ervis Xhixhën për t’i marrë 70 mijë euro, është arrestuar sot nga policia.
Ngjarja ka ndodhur më janar të vitit të kaluar, kur Hektor Xheçuka “ushtari” i Ervis Martinajt, së bashku me ish-presidentin e klubit të Kamzës Naim Qarrin dhe 5 persona të tjerë morën peng 35 vjeçarin.
Si ndodhi ngjarja
Pengmarrja ka ndodhur në janar të vitit 2024, kur Ervis Xhixha është rrëmbyer në Kamëz dhe është mbajtur për 1 orë rresht ku është dhunuar nga personat e përfshirë për shkak të një borxhi prej 70 mijë eurosh që ia kishte “Tori” Xheçukës, i cili është ende në kërkim.
Pasi u la i lirë, Xhixha bëri kallëzim në polici dhe vetëm në korrik të vitit të kaluar u bë i mundur arrestimi i 5 prej personave që kishin marrë pjesë në pengmarrje, ndërsa u shpallën në kërkim Fredi Keta i cili u arrestua sot dhe Xheçuka.
Ervis Xhixha është një personazh i njohur për drejtësinë, pasi u arrestua në vitin 2019, për shkak se tentoi të vrasë në Zall Herr Bujar Beshirin, pas një konflikti me këtë të fundit, por më pas qëlloi në ajër.
Xheçuka i njohur si njeri i besuar i Martinajt, ishte shpallur në kërkim nga SPAK lidhur me operacionin “Revanshi”. Dyshohet se aktualisht ndodhet në Dubai, aty ku shumë personazhe të krimit shijojnë lirinë si të paprekshëm. Nga zbërthimi i bisedave në aplikacionin SkyECC ka rezultuar se Tori Xheçuka alias Hektor Xheçuka ka pasur rolin e organizatorit dhe ekzekutorit të atentatit të dështuar ndaj Durim Bamit më 4 nëntor 2020 pranë Urës së Tapizës në Krujë Kruje. Versus.al
