Tiranë- Prokuroria e kryeqytetit ka shpallur moskompetencën për hetimin e dosjes së skandalit të spitalit të Onkologjikut ku u zbulua se mjekët abuzonin me detyrën duke mos trajtuar pacientët me kancer teksa i drejtonin në klinika private.
Versus.al mëson se dosja e hetimit për skandalin që ngriti në këmbë shtetin, i ka kaluar SPAK-ut, teksa formulohet edhe akuza për 'grup të strukturuar kriminal'. Vendimi për t'ja kaluar çështjen SPAK-ut për hetim më të thelluar u mor nga prokurori Bledar Valikaj.
Skandali u zbulua pas denoncimit të një familjari. Pacientëve me kancer nuk u ofrohej shërbimi që duhej t’u jepej falas por orientoheshin drejt klinikës private “Megis” në pronësi të mjekut Edmond Gashi i cili i operonte shpesh herë edhe duke i alarmuar për gjendjen e tyre edhe në rastet kur situata nuk ishte serioze. Pjesë e skemës ishte edhe mjekja Alketa Pere (Ymeri) e cila sipas dosjes së përgatitur nga prokurori Valikaj, rezultonte të ishte e punësuar “në të zezë” në klinikën private të mjekut Gashi. Ndërsa zv.drejtoresha e asaj kohe, Brikena Qirjazi akuzohet se nuk ka ushtruar detyrën duke lënë jashtë funksionit pajisjen për trajtimin e kancerit, rast për të cilin kishte bërë denoncim edhe mjeku Ardian Hoti i cili foli edhe për Versus.al duke dhënë detaje mbi ngritjen e shqetësimeve të tij për rastin e rëndë.
Gjykata e Tiranës konfirmoi si më poshtë masat ndaj 7 të akuzuarve:
Edmond Gashi, mjek onkolog në spitalin e Onkologjikut– “Arrest shtëpie” - Shpërdorim detyre
Alketa Pere Ymeri mjeke onkolog në spitalin e Onkologjikut – “Detyrim paraqitje” - Shpërdorim detyre
Brikena Qirjazi Ish zv.drejtoreshë e QSUT - “Detyrim paraqitje” - ''Shpërdorim detyre"
Emiljano Lela Koordinatori pranë onkologjikut - “Detyrim paraqitje” - Shpërdorim detyre
Drilona Kishta ish-specialist pranë QSUNT banuese në Amerikë - “Detyrim Paraqitje” - Shpërdorim detyre
Halil Gashi administrator i klinikës Megis, babai i mjekut Gashi – “Detyrim paraqitje” - Fshehje e te ardhurave
Florian Marku administrator farmacie – “Arrest shtëpie”
-
FOTOT/ Raporti i KLSH-së: Onkologjiku në 'ditë të hallit', me myk e minj
27 Qershor, 20:26
Për skandalin e zbuluar gjatë interpelancës së zhvilluar në Kuvend, deputetët e opozitës kërkuan dorëheqjen e ministres së Shëndetësisë Albana Koçiu. Ndërsa në një takim që kryeministri Edi Rama pati me mjekët e Onkologjikut tha se do të ketë ndryshime në ligjin për Urdhrin e Mjekut duke vendosur qartë kufizimet për ata të cilët punojnë në klinika private përveç punës në shtet. Versus.al
