Një grup kriminal që merrej me trafikun e armëve të zjarrit tip “Pistoletë” nga Kosova drejt Shqipërisë, është goditur nga policia e Tiranës gjatë vijimit të operacionit “Sundimi i Ligjit”.
Në vendparkimin e një terminali të autobusëve në Lundër ku u gjetën 10 armë zjarri “pistoletë” dhe 10 krehra e sasi municioni luftarak, u arrestuan në flagrancë: Blerim Krasniqi, 28 vjeç, Benjamin Shala 20 vjeç, Edonis Thaçi, 25 vjeç dhe Muhamet Krasniqi, 20 vjeç.
Katër të rinjtë dyshohet se kishin trafikuar armët në Tiranë me qëllim shitjen e tyre me çmime nga 1500 deri në 3000 euro.
Plani i ndjekur për trafikun e armëve
Blerim Krasniqi kishte vendosur në autobusin e drejtuar nga Edonis Thaçi çantën brenda së cilës u gjetën armët e zjarrit dhe sasia e municionit luftarak. Më pas Blerim Krasniqi dhe Muhamet Krasniqi kanë ndjekur me automjetin e tyre autobusin gjatë itinerarit të përshkruar.
Sipas policisë, pronari i linjës së autobusëve, Edonis Thaçi së bashku me persona të tjerë, ka trafikuar armë zjarri drejt Shqipërisë në disa raste.
