Sot në komisionin e posaçëm të ngritur nga ministria e Brendshme për zgjedhjen e drejtorit të Përgjithshëm të Policisë, po zhvillohet një dëgjesë me 11 kandidatët e këtij posti.
Dëgjesa po monitorohet edhe nga partnerë ndërkombëtarë. Ndërsa mësohet se kandidati i cili do të arrijë të grumbullojë më së shumti pikë nga vlerësimet e anëtarët e komisionit, do t’i propozohet ministrit të Brendshem Ervin Hoxha dhe ky i fundit, do e dorëzojë emrin e tij në tavolinën e kryeministrit Edi Rama për miratimin zyrtar.
Çështja e vakancës në postin e kreut të policisë është kthyer edhe në debat parlamentar ku në mbledhjen e komisionit të Sigurisë pak ditë më parë deputetët demokratë i kërkuan llogari ministrit të Brendshëm Ervin Hoxha për kandidaturën e Hajrulla Xhivinit i cili edhe pse i shpallur në kërkim nga krimi kibernetik, gjeti guximin të aplikonte për postin e drejtorit duke marrë shkas se ka qenë anëtar i akademisë së Sigurisë.
Fillimisht numri total i aplikimeve për postin e kreut të policisë ishte 15, ndërsa 4 u skualifikuan për shkak se nuk përmbushnin kriteret e përcaktuara në Ligjin për policinë të miratuar në Kuvend gjatë muajit korrik.
Aktualisht në garë për drejtorin e përgjithshëm janë kandidaturat e Adriatik Tafçiut, Altin Menës, Ardian Çipës, Lutfi Minxhozit, Gentjan Shehajt, Idajet Faskajt, Ilir Prodës, Skënder Hitës, Neritan Nallbatit, Pëllumb Seferit dhe Rebani Jaupit. Versus.al
