Arritja e Ramazanit në New York City këtë vit u shënua me mesazhe të forta për bashkësinë dhe për rinovimin shpirtëror, ndërsa kryetari i qytetit, Zohran Mamdani, u uroi myslimanëve dhe shprehu gëzim për takimet me besimtarët.
I pyetur nga gazetarët se si ndihej në ditën e parë të agjërimit, ai u përgjigj me humor se “aktualisht ndihem mjaft i etur”, duke shtuar se Ramazani është muaji i tij i preferuar i vitit. Ai theksoi se shpesh ky muaj reduktohet vetëm në idenë e mosngrënies dhe mospirjes nga agimi në perëndim, por kështu humbet dimensioni i reflektimit personal dhe shpirtëror, raportoi The New York Times.
Më shumë se gjysmë milioni myslimanë praktikues në qytet shënojnë fillimin e muajit të shenjtë, i cili për besimtarët në mbarë botën shoqërohet me agjërim, lutje, bamirësi dhe përkushtim shpirtëror. Agjërimi gjatë Ramazanit është një nga pesë shtyllat e Islamit dhe përfundon çdo mbrëmje me iftar, vaktin që ndahet me familjen dhe komunitetin.
Për Mamdanin, ky është Ramazani i parë si kryebashkiak dhe ai pritet ta kalojë mes një axhende intensive me angazhime publike. Ai planifikon të organizojë iftare me punonjës të shërbimeve publike dhe komunitete të ndryshme myslimane, ndërsa do të vazhdojë aktivitetet zyrtare duke agjëruar gjatë gjithë ditës.
Stafi i tij ka bërë të ditur se do të ketë edhe iniciativa shpërndarjeje ushqimi dhe takime me komunitete të ndryshme etnike myslimane të qytetit, për të nxjerrë në pah larminë kulturore dhe kontributin e tyre në jetën urbane.
Ky Ramazan vjen në një periudhë sfiduese për shumë myslimanë, për shkak të tensioneve globale dhe shqetësimeve sociale, por mbështetësit e kryebashkiakut shpresojnë se prania e tij në krye të qytetit do të shërbejë si simbol përfaqësimi dhe krenarie për komunitetin./Versus.al
