Kremlini tha të dielën se ishte gabim të flitej për anulimin e takimit midis Presidentit rus Vladimir Putin dhe Presidentit të SHBA-së Donald Trump, por shtoi se përgatitja për të ishte e nevojshme, raportoi televizioni shtetëror Vesti në kanalin e tij Telegram.
"Presidentët nuk mund të takohen për hir të takimit, ata nuk mund të humbasin kohën e tyre dhe janë të hapur për këtë. Kjo është arsyeja pse ata udhëzuan (Ministrin e Jashtëm rus Sergei) Lavrov dhe (Sekretarin e Shtetit të SHBA-së Marco) Rubio të përgatitnin këtë proces. Procesi është i ndërlikuar", i tha zëdhënësi presidencial rus Dmitry Peskov gazetarit të televizionit shtetëror të Kremlinit, Pavel Zarubin.
Peskov komentoi gjithashtu sanksionet e vendosura nga SHBA-të ndaj gjigantëve rusë të naftës Lukoil dhe Rosneft, duke i quajtur ato një "hap armiqësor", por tha se Rusia kërkon të ndërtojë marrëdhënie miqësore me të gjitha vendet, përfshirë SHBA-në .
"Pavarësisht dallimeve të ndryshme të shprehura nga presidenti i SHBA-së, ne duhet të vazhdojmë të orientohemi drejt interesave tona. Interesat tona janë të ndërtojmë marrëdhënie të mira me të gjitha vendet, përfshirë SHBA-në", i tha Peskov gazetarit Pavel Zarubin.
"Sigurisht, veprimet e ndërmarra këtë javë [të fundit] ishin një hap armiqësor. Ato dëmtuan vërtet perspektivat për rivendosjen e marrëdhënieve tona. Por kjo nuk do të thotë që ne duhet t'i braktisim këto pritje. Ne duhet të bëjmë atë që është e mirë për ne ", tha Peskov.
Zëdhënësi i presidentit rus tha gjithashtu se Rusia do të ndjekë penalisht këdo që gjendet i përfshirë në një sekuestrim të mundshëm të aseteve të ngrira ruse.
