Një grua ndodhet në kujdes intensiv në spital pasi u sulmua nga ujqërit teksa vraponte në një park kafshësh pranë Parisit, raportojnë mediat franceze.
Ata thonë se të dielën në mëngjes, gruaja 36-vjeçare e cila po qëndronte në një shtëpizë brenda parkut Thoiry, u largua në zonën kryesore të safarit, e cila është e rezervuar vetëm për të lëvizur me makinë dhe jo në këmbë.
Ajo u sulmua nga tre ujqër arktikë dhe ka marrë kafshime të rënda në qafë, shpinë dhe një këmbë.
Thoiry, rreth 40 km në perëndim të Parisit, është një nga parqet më të njohura të kafshëve të egra në Francë. Rreth 800 kafshë që mbahen atje lejohen të bredhin të lirë, ndërsa vizitorët futen nëpër kafazë sigurie ose në makina të ndërtuara posaçërisht për shëtitjen brenda parkut.
Parku ofron strehim pranë rrethimeve të ujqërve dhe arinjve, me zonën e mbrojtur nga gardhe elektrike dhe kanale, raporton faqja e lajmeve France Info.
Nuk është e qartë se si gruaja hyri në zonën vetëm për makina të safarit. Autoritetet e parkut nuk kanë bërë asnjë koment deri më tani.
"Ne nuk e dimë në këtë fazë nëse gruaja ka bërë një gabim apo nëse ka pasur ndonjë problem me tabelat", tha një burim i policisë për gazetën Le Parisien.
Gruaja u shpëtua pasi punonjësit e parkut dëgjuan britmat e saj ndërsa po sulmohej dhe u dërgua në një spital aty pranë.
Një hetim është duke u zhvilluar.
