Futbollisti i kombëtares, Armando Broja ka dhënë një intervistë ku ka folur për karrierën e tij futbollistike dhe për europianin që pritet të nisë më 14 qershor në Gjermani.
Ai pati lëvdata për tifozët kuqezi duke i cilësuar si “më të mirët në botë”.
“Tifozët e Shqipërisë janë më të mirët në botë. Ne jemi një trup i vetëm. Lojtarët, tifozët dhe vendi ynë të gjithë së bashku kemi”, nis rrëfimin e tij Broja duke u ndalur më pas tek mënyra e tij e festimit, ku në Angli e lidhin me një imitim ndaj Anelkas, ish sulmuesi i Chelsea, por Broja e përsëriti se festa e tij ka lidhje me simbolin e vendit të tij, shqiponjën:
“Kur shënoj festoj duke bërë shqiponjën. Të gjithë mendojnë se imitoj Anelkanë, por unë festoj sepse dashuroj vendin tim. Është një mënyrë festimi unike”, theksoi Broja.
Sulmuesi shqiptar u pyet edhe në lidhje me Euro2024, ftesën e marrë nga Sylvinho dhe grupin ku bën pjesë Shqipëria:
“Do të jetë një emocion i madh për mua. Dua të falënderoj edhe familjen pasi më ka mbështetur gjithmonë. Të gjithë e dimë se jemi në një grup të fortë, mbase më i vështiri në Europian, por ne mund të shkojmë në Gjermani dhe mund të bëjmë diçka të veçantë”, u shpreh Broja.
