Një bandë e organizuar kriminelësh ka realizuar një grabitje spektakolare në Kala Mijor në lindje të Majorkas, një destinacion i preferuar nga turistët gjermanë. Sipas raporteve të gazetës spanjolle “Ultima Hora”, grabitësit, të cilët besohet se janë nga Shqipëria, kanë hyrë në një hotel në mbrëmjen e së dielës dhe kanë vjedhur dy kasaforta që përmbanin bizhuteri dhe para.
Sipas informacionit të siguruar nga Guardia Civil, grabitësit kanë përdorur mjete speciale për të arritur në qëllimet e tyre. Ata kishin një njohuri të detajuar mbi vendndodhjen e kasafortave dhe kanë arritur të fiknin rrjetin WiFi në të gjithë rrugën për të parandaluar aktivizimin e sistemit të alarmit të hotelit. Hetuesit janë të mendimit se ata mund të kenë pasur ndihmë nga individë brenda sistemit spanjoll për të realizuar këtë operacion të ndërlikuar.
Grabitja u zbulua mëngjesin e së dielës kur punonjësit e hotelit hynë në ndërtesë dhe gjetën se ishin vjedhur kasafortat. Në lidhje me këtë incident, Guardia Civil është angazhuar në një hetim të thelluar dhe është në kërkim të kriminelëve të arratisur.
Së bashku me këtë ngjarje, hetuesit po shqyrtojnë gjithashtu një sulm tjetër të ndodhur të dielën në mëngjes në një kompani peshkimi në një park tregtar në Capdepera, ku u hap gjithashtu një kasafortë. Dyshohet se sulmi në Capdepera mund të jetë lidhur me të njëjtën bandë kriminale, e cila besohet se është shqiptare.
Aktualisht, autoritetet janë duke analizuar pamjet nga kamerat e vëzhgimit dhe po shqyrtojnë të gjitha mundësitë për të identifikuar dhe kapur anëtarët e bandës.
