Çfarë do të gjeni në brendësi
*Që prej mbrëmjes së djeshme, mijëra shqiptarë nga vende të ndryshme të Evropës u nisën me automjete e me avion drejt Shqipërisë. Me flamuj të shumtë nëpër dritaret e makinave, mijëra prej tyre kaluan sot pikën kufitare të Muriqanit për të mbërritur në Shkodër nga ku më pas do të nisen drejt Tiranës për protestën kombëtare të thirrur para qeverisë. *Kërkesat e tyre mbeten të njëjta, dorëheqja e kryeministrit Edi Rama dhe klasës së vjetër politike si dhe dalja e tij para drejtësisë së bashku me kryedemokratin Sali Berisha. *Sot në ditën e 21 të protestës, pritet të shënohet pjesëmarrja më e madhe e një revolte që nisi nga rrethimi i tokës në Zvërnec dhe tërheqja zvarrë e njërit prej protestuesve nga policia private në sy të policisë së shtetit që heshti.
Marjana Koçeku shfaqet në protestë pak ditë pas ndarjes me PS-në
Deputetja Marjana Koçeku është shfaqur në protestën e zhvilluar në Tiranë, vetëm pak ditë pasi njoftoi largimin e saj nga grupi parlamentar i Partisë Socialiste.
Më 14 qershor, Koçeku bëri publik vendimin për t’u shkëputur nga shumica qeverisëse që e çoi në Kuvend, ndërsa një ditë më vonë publikoi në rrjetet sociale simbolin e flamingos, i cili është kthyer në një nga elementët identifikues të protestave që po zhvillohen prej javësh në vend.
Prania e saj në tubimin e së shtunës ka tërhequr vëmendjen, duke ardhur në një moment kur ish-deputetja e mazhorancës ka marrë qëndrime publike të ndryshme nga ato të Partisë Socialiste./Versus.al
Rama reagon për protestën, publikon fotot: Shkelësja e ligjit vishet me flamurin e interesit publik
Kryeministri Edi Rama reagoi në rrjetet sociale lidhur me protestën e zhvilluar sot në Tiranë, duke publikuar dy fotografi dhe duke vënë në shënjestër një prej protestueseve që bëri thirrje për mobilizimin e diasporës.
Në postimin e tij, Rama publikoi një foto të një ndërtese që sipas tij përbën një shtesë pa leje brenda mureve të Kalasë së Durrësit dhe një tjetër të protestueses që deklaroi se diaspora këtë vit do të vijë në Shqipëri për protestë dhe jo për pushime.
Sipas kryeministrit, protestuesja është e njëjta person që ka ndërtuar objektin në fjalë dhe që kundërshton procesin e shpronësimit të parashikuar në kuadër të projektit për rigjallërimin e zonës historike të Durrësit.
Rama e cilësoi rastin si shembull të asaj që ai e quan manipulim në rrjetet sociale, ku persona me interesa private paraqiten si mbrojtës të interesit publik dhe të trashëgimisë kulturore.
Në reagimin e tij, kreu i qeverisë e akuzoi protestuesen për shkelje të ligjit dhe e lidhi atë me aktivitet politik në radhët e Partisë Demokratike, ndërsa theksoi se objekti në fjalë do të jetë pjesë e procesit të pastrimit urban dhe restaurimit të zonës historike të Durrësit.
Postimi i plotë i Ramës:
DY FOTOGRAFI DHE DY FYTYRAT E NJË SIMBOLI TË THIRRJES PËR DIASPORËN NË PROTESTË
Majtas: Një shtesë skandaloze pa leje brenda mureve të kalasë së Durrësit. Shteti do ta shpronësojë në kuadrin e pastrimeve për Rilindjen e Zonës Historike, sipas projektit të miratuar.
Djathtas: Një protestuese e përbetuar për mbrojtjen e mjedisit që bërtet, “Diaspora këtë vit nuk do të vijë për pushime, por për protestë”. Ajo është vetë ndërtuesja e shtesës pa leje, e cila ka deklaruar përpara meje se do hidhet me kokë nga tarraca, po nuk e pranon fondin e shpronësimit të atij çibani ngaqë i duket pak
Pikërisht kështu funksionon algoritmi i manipulimit në rrjetet sociale:
Një shkelëse e ligjit, qëndrestare kundër pastrimit të trashëgimisë kulturore nga çibanët e ndërtuar pa leje vishet me flamurin e interesit publik, ve kujën për atdheun në rrezik dhe kthehet në heroinë
Fakti pastaj që ky personazh grotesk është edhe militante e vajmedet Partisë Demokratike, e fut rastin në një kornizë shembullore të dashurisë për natyrën
*Çibani ka një hipotekë nga koha e dy gishtave
Nga qeveria teknike tek hetim për Ramën, diaspora shpalos kërkesat në protestë
Përfaqësues të diasporës shqiptare, të ardhur në Tiranë për t’iu bashkuar protestës së 21-të para Kryeministrisë, kanë paraqitur një sërë kërkesash që, sipas tyre, synojnë reformimin e sistemit politik dhe rritjen e besimit të qytetarëve te institucionet.
Gjatë fjalimeve nga podiumi i protestës, një prej përfaqësuesve kërkoi që SPAK të ndërmarrë hapa për heqjen e imunitetit të kryeministrit Edi Rama dhe nisjen e procedurave hetimore ndaj tij.
Gjithashtu, ai iu drejtua edhe Gjykatës Kushtetuese, duke kërkuar shqyrtimin e çështjeve që, sipas protestuesve, kërkojnë vëmendjen e institucionit më të lartë kushtetues në vend.
Një tjetër propozim i paraqitur ishte ngritja e një qeverie teknike me mandat njëvjeçar, e përbërë nga ekspertë dhe figura jopartiake.
Sipas tyre, gjatë kësaj periudhe duhet të organizohet edhe një referendum popullor, rezultatet e të cilit të pasqyrohen më pas në Kushtetutën e vendit.
Diaspora kërkoi gjithashtu verifikimin e pasurive të politikanëve, deputetëve dhe ministrave, si dhe sekuestrimin e pasurive që nuk justifikohen me burime të ligjshme të ardhurash.
Protestuesit deklaruan se pjesëmarrja e tyre në tubim lidhet me shqetësimet për zhvillimet politike dhe sociale në vend, si dhe me fenomenin e emigrimit të shqiptarëve gjatë viteve të fundit./Versus.al
Protestuesja nga Italia ultimatum Ramës: Rruga drejt dorëheqjes qoftë sa më e lehtë
Një protestuese e ardhur nga Italia mori fjalën gjatë tubimit të zhvilluar në Tiranë, ku i adresoi një mesazh të drejtpërdrejtë kryeministrit Edi Rama në emër të shqiptarëve të diasporës.
Ajo deklaroi se protestuesit e mbledhur përfaqësojnë, sipas saj, votat e diasporës që nuk janë respektuar, ndërsa theksoi se shqiptarët që jetojnë jashtë vendit po qëndrojnë krah protestuesve në Shqipëri.
Në fjalën e saj, protestuesja përmendi edhe mbështetjen e disa eurodeputetëve, duke pretenduar se ata po ndjekin nga afër zhvillimet dhe kërkesat e ngritura nga protestuesit.
Në përfundim të fjalimit, ajo i kërkoi kryeministrit Rama të japë dorëheqjen, duke e cilësuar këtë si zgjidhjen e duhur për situatën politike në vend.
“Jemi të gjitha votat që ke vjedhur në diasporë këtu sonte. Sot jemi këtu për t’ju sjellë një mesazh të qartë, diaspora e Milanos ecën krah për krah e protestuesve të Tiranës.
Kemi ngritur zërin në Itali ashtu siç po e ngrini ju sot këtu. Shqipëria është vendi ynë dhe do e mbështesim deri në fund.
Ne nuk jemi vetëm, dua ti them Ramës se ne kemi mbështetjen dhe të eurodeputetëve të parlamentit evropian.
Ata po na ndjekin hap pas hapi, po na dëgjojnë zërin, po lexojnë një për një pankartat.
Kanë shprehur gatishmëri për të qenë pranë nesh deri në fund.
Zoti Rama të uroj që rruga drejt dorëheqjes të jetë sa më e lehtë”, tha protestuesja.
/Versus.al
Ultimatum për Ramën nga protesta e ditës së 21-të: Jep dorëheqje, ose do të ketë revolucion me dhunë!
Qytetarë nga Tirana dhe zona të tjera të vendit janë mbledhur sërish në sheshin “Skënderbej”, në kuadër të ditës së 21-të të protestës, për të marshuar më pas drejt godinës së Kryeministrisë.
Protestës i janë bashkuar edhe shqiptarë të ardhur nga diaspora, të cilët me flamuj kombëtarë dhe pankarta në duar kanë shprehur mbështetjen e tyre ndaj kërkesave të protestuesve. Në një prej pankartave shfaqej mesazhi: “Dorëheqje deri nesër ose do të ketë revolucion me dhunë”.
Pas mbërritjes para Kryeministrisë, pjesëmarrësit pritet të mbajnë fjalime dhe më pas të vijojnë marshimin në rrugët kryesore të kryeqytetit./Versus.al
VIDEO/ "Erdhën bijt e shqipes", diaspora mbërrin në Tiranë për protestën. Dhjetëra makina me flamuj kuq e zi përshkojnë rrugët e kryeqytetit
Autokolonat me emigrantë shqiptarë kanë hyrë në Tiranë për t’iu bashkuar protestës së organizuar kundër qeverisë.
Dhjetëra automjete, të shoqëruara me flamuj kuqezi, përshkuan rrugët e kryeqytetit duke tërhequr vëmendjen e qytetarëve.
Të ardhur nga vende të ndryshme ku jetojnë dhe punojnë, emigrantët u bënë pjesë e tubimit për të shprehur mbështetjen e tyre ndaj protestuesve dhe kërkesave të tyre.
Prania e diasporës në protestë u konsiderua si një shenjë solidariteti dhe angazhimi, duke treguar se interesimi për zhvillimet në vend mbetet i fortë edhe tek shqiptarët që jetojnë jashtë kufijve.
View this post on Instagram
Radhë kilometrike në pika kufitare, diaspora mbërrin në Shqipëri për protestën e sotme
Në pikën kufitare të Muriqanit është krijuar një autokolonë e gjatë automjetesh që presin të hyjnë në Shqipëri. Me mijëra shqiptarë që jetojnë në shtete të ndryshme të Europës kanë bërë një rrugë të gjatë për të mbërritur në atdhe.
Siç shihet edhe nga pamjet, me flamuj kuqezi në dritare, shqiptarët janë bërë bashkë për të qenë të pranishëm në protestën që mbahet në Tiranë për ditën e 21 me radhë duke kërkuar dorëheqjen e kryeministrit Edi Rama dhe të klasës së vjetër politike. Versus.al
Diaspora vërshon për në atdhe, mijëra shqiptarë drejt Tiranës! Çfarë pritet në protestën e sotme
Sot në Tiranë pritet të mbahet një ndër protestat më të mëdha që prej se kanë nisur tubimet për Zvërnecin që më pas u fokusuan në kërkesën për dorëheqjen e Edi Ramës si kryeministër.
Me mijëra shqiptarë nga vende të ndryshme të Evropës janë nisur drejt Shqipërisë për të qenë të pranishëm në protestën e 21-të që mbahet mbrëmjen e sotme para qeverisë.
Pamjet e publikuara në rrjetet sociale tregojnë varg të gjatë automjetesh të nisura nga Britania e Madhe, Franca, Gjermania për të mbërritur në protestën që mbahet të shtunën. Me flamuj kuqezi teksa kalonin kufirin tokësor të shteteve të ndryshme, mijëra prej tyre janë parë teksa valëvisin flamurin kuqezi nga dritaret e makinave.
Ata pritet t’u bashkohen sot bashkëatdhetarëve të tyre të cilët prej javësh kërkojnë dorëheqjen e kryeministrit Edi Rama dhe të gjithë kastës së vjetër politike. Versus.al
