Portieri gjerman Manuel Neuer njoftoi tërheqjen e tij nga futbolli ndërkombëtar të mërkurën, pasi luajti 124 herë për vendin e tij që nga viti 2009.
Ylli 38-vjeçar i Bayern Munichut ndihmoi Gjermaninë të fitonte Kupën e Botës 2014 dhe gjithashtu fitoi Dorezën e Artë për portierin më të mirë të turneut. “Sot është fundi i karrierës sime në kombëtaren gjermane të futbollit”, shkroi Neuer në Instagram.
“Kushdo që më njeh e di që nuk e kam marrë lehtë këtë vendim. Ndihem shumë mirë fizikisht dhe, sigurisht, Kupa e Botës 2026… do të më kishte tërhequr gjithashtu. E megjithatë arrita në vendimin, se tani, është pikërisht koha e duhur për të përfunduar kapitullin tim në ekipin kombëtar”, shtoi ai.
Federata Kombëtare e Futbollit të Gjermanisë (DFB) ka nderuar Neuerin, duke e quajtur atë një nga portierët më të mëdhenj të të gjitha kohërave. “Të gjitha fjalët duken shumë të vogla. Por ato vijnë nga zemra: Faleminderit, Manu”, tha DFB në një deklaratë. Si një rezervë. Si kapiten. Si një model. Si kampion bote. Si mik. Do të na mungosh!”
Marc-André ter Stegen i Barcelonës pritet të marrë postin e portierit të parë të “panzerave” për ndeshjet e ardhshme të Ligës së Kombeve dhe kualifikueset e Kupës së Botës.
Bayern, me të cilin Neuer ka fituar 11 tituj të Bundesligës, dy Liga të Kampionëve dhe dy tituj të Kupës së Botës për Klube, fillon kampionatin në Ëolfsburg të dielën.
