Artistët shqiptarë kanë dalë në mbrojtje të reperit Rigels Rajku i njohur si “Noizy” i cili u arrestua pas mesnatës së djeshme në Shëngjin në kuadër të urdhrit të nxjerrë nga policia e Kosovës e cila e akuzon për pjesëmarrje në rrahjen brutale të personazhit të TikTok-ut Medi Iseni.
Ka qenë këngëtari Elgit Doda ai i cili ka nisur reagimet duke shpërndarë një tekst ku shprehej se ajo që po i bëhej Noizyt në këtë rast është e padrejtë dhe se shteti duhet të marrë më shumë masa për personazhet e rrjeteve sociale që kërkojnë të bëhen të famshëm duke ofenduar familjet e artistëve të ndryshëm.
“Të jesh artist dhe njeri publik nuk do të thotë (të jesh) i cenueshëm dhe tabelë qitjeje për kërcënime, shantazhe, fyerje e denigrime të imazhit. Unë jam sot #MeNoizyn, artistin që pasi është kërcënuar, sulmuar e dhunuar verbalisht bashkë me familjen, sot gjendet padrejtësisht nën akuzë nga drejtësia në Kosovë dhe i ndaluar në Shqipëri.
Ne respektojmë institucionet, respektojmë ligjet, por sa të sigurt duhet të ndihemi ne dhe familjet tona kur shohim se drejtësia vepron me disa standarde? Kur shohim se disa personazhe përdorin TikTok-un dhe rrjetet sociale për të na kërcënuar deri edhe me jetë? Më pas, i dalin zot dhunës së tyre verbale e prapë së prapë nuk u hyn gjemb në këmbë? Ndërkohë që Noizy, personazhi publik që e kanë atakuar me sulme nga më të ulëtat ndalohet pa pasur asnjë provë kundër tij?
Sot jam #MeNoizyn për të mbrojtur artistët dhe artin. Jam #MeNoizyn për të mbrojtur njeriun e përkushtuar ndaj pinës dhe vlerave që mbart arti. Jam #MeNoizyn për të mbrojtur veten dhe familjen. Sepse drejtësia duhet të ketë një dhe vetëm një standard”, shkruan këngëtari Elgit Doda.
Postimi më pas është shpërndarë nga artistë dhe njerëz të shoëbizit, si Era Istrefi, Tayna, Xhensila Myrtezaj, Blerim Destani, Çiljeta, Bardhi etj të cilët i kanë dalë në mbrojtje reperit që prej ditës së djeshme është nën arrest për rrahjen brutale ndaj Medi Isenit.
Ky i fundit në një dalje në Tik-Tok ditën e djeshme tha se kishte qenë reperi Arkimed Lushaj i njohur si “Stresi” ai që kishte thurur planin për ta nxjerrë në pritë dhe më pas Noizy me grupin e tij e kishin sulmuar me grushte dhe doreza hekuri. Konflikti nisi për sharjet që ky i fundit kishte bërë në rrjetet sociale së bashku me personazhin tjetër të TikTok-ut Kleviol Ahmeti i cili është shpallur në kërkim për vendosjen e lëndës plasëse ndaj pronave të Noizyt. Versus.al
