Ministri i Brendshëm, Besfort Lamallari tha se policia kishte përdorur lëndë irrituese ndaj protestuesve të dhunshëm gjatë protestës së sotme. Ndërsa akuzoi PD-në se po mundohej të përvetësonte protestën, ai tha se preferonte kohët kur hidheshin molotovët dhe jo tani që sipas tij “hidhet guri e fshihet dora”.
“Janë lëndë speciale irrituese profesionale për vetëmbrojtje dhe neutralizim të personave të dhunshëm të cilat përdoren nga vende në BE dhe forca të SHBA. Megjithatë lajmi këtu nuk spraji i përdorur, por lajmi është se kishte lezet partia e molotovarëve se i dilte ballë gjësë me njerëzit me kapuça e molotovë atëherë. Por tani që hedhin gurin e fshehin dorën të shndërrohet nga partia e molotovarëve në partinë e skuthave bashkë me nënproduktet e tyre që paguajnë njerëz e mendojnë se protesta bëhet me mercenarë të paguar”- tha Lamallari. Versus.al
