Duke nisur nga dita e sotme, deputetët e Partisë Demokratike do t’i rikthehen normalitetit në jetën parlamentare që nga pjesëmarrja në seancat plenare të Kuvendit e deri tek mbledhjet e komisioneve.
Ky ka qenë vendimi që është marrë gjatë një mbledhje me dyer të mbyllura të grupit parlamentar të Partisë Demokratike. Në një deklaratë për mediat, kreu i grupit parlamentar të PD, Gazment Bardhi tha se vendimi për të qenë në Kuvend është marrë me qëllim që deputetët të japin propozimet e tyre lidhur me diskutimet rreth buxhetit 2025.
“Ne kishim shpallur një vendimmarrje grupi që nuk do ketë një normalitet në kuvend pa u plotësuar 4 kushte. Në rastin konkret, pa diskutim që aksioni politik i PD do të vazhdojë, deputetët do i prijnë aksionit. Por do të përmbushin përgjegjësitë e tyre si përfaqësues të qytetarëve për t’u shërbyer interesit të qytetarëve në Kuvend. Në raport me Kuvendin do vendosim rast pas rastit. Kushdo që ka shpresuar se ne do i lëmë Ramës terren të lirë për të kaluar buxhetin e oligarkëve, e ka shumë gabim. Do jemi aty për t’u përballur në mbrojtje të qytetarëve, biznesmenëve dhe fermerëve”- u shpreh Bardhi.
I pyetur nga gazetarët nëse kjo është një lloj tërheqje nga “mosbindja civile” e trumbetuar vazhdimisht së fundmi, Bardhi e mohoi një gjë të tillë duke thënë se aksioni i mosbindjes civile do të vijojë, por theksoi domosdoshmërinë e përballjes politike në Kuvend dhe komisionet parlamentare.
“Nuk kemi ikur ndonjëherë nga parlamenti. Do jemi në përballje kudo, brenda parlamentit, në rrugë dhe mosbindje civile. Por kjo nuk nënkupton se ne duhet të ikim nga përballja në Kuvendin e Shqipërisë. Do i përgjigjemi sjelljes së kundërshtarëve tonë brenda parlamentit, rast pas rastit, sa herë të ketë shkelje të të drejtave të qytetarëve”- shtoi Bardhi.
Ndër të tjera, ai tha se kryeministri Edi Rama ka frikë të përballet me opozitën dhe se për këtë arsye ka urdhëruar Gardën të pengojë deputetët e PD që të hyjnë në sallën e seancave plenare.
“Nuk kemi penguar askënd, ne jemi penguar të futemi në Kuvend. Përballja me Gardën nuk ka qenë vendimmarrje e jona por e mazhorancës për të nxjerrë efektivët që të na pengonin. Ne kemi shkruar çdo të enjte për të marrë pjesë në seancë. Nuk ikim ne nga Kuvendi, e kemi bërë një herë atë gabim në vitin 2019 dhe nuk kemi ndërmend ta përsërisim. I vetmi që ikën është Edi Rama që fshihet pas Elisës sepse është një frikacak”- tha kreu i grupit parlamentar të PD.
Bardhi tha se deputetët e PD do të paraqiten në Kuvend për të marrë pjesë në seanca pavarësisht se janë të përjashtuar, duke argumentuar se Gjykata Kushtetuese e ka rrëzuar vendimin e qeverisë që miratoi rregulloren e ashpër. Mes të tjerash shtoi se aksioni i dhunshëm në Kuvend kishte nisur si revoltë për dënimin e Ervin Salianjit dhe jo me qëllim lënien e sallës së Kuvendit si në 2019-ën kur deputetët opozitarë dogjën mandatet. Versus.al
