Kryeministrja e Italisë Giorgia Meloni në takimin e fundit të saj elektoral ka falenderuar kryeministrin shqiptar Edi Ramën për marrëveshjen e emigrantëve të nënshkruar mes dy shteteve.
Meloni u tha mbështetësve të saj se kryeministri Rama meritonte një përqafim për shkak të ndihmës që i ka dhënë Italisë.
“Le t’i japim një përqafim kryeministrit socialist të Shqipërisë, Edi Ramës, i cili u masakrua vetëm sepse ndihmoi Italinë”, ka thënë mes të tjerash Meloni.
Më 6 nëntor 2023 kryeministri Edi Rama dhe kryeministrja italiane Giorgia Meloni nënshkruan në Romë marrëveshjen për ndërtimin në Shqipëri të dy qendrave për strehimin e emigrantëve.
Sipas marrëveshjes porti i zbarkimit do të jetë Shëngjini, ndërsa Gjadri do të jetë kampi ku do të ndërtohet vendqëndrimi i tyre. Kapaciteti maksimal i numrit që do të presë qendra në Shqipëri nuk mund të jetë më shumë se 3 mijë emigrantë në muaj.
