Tiranë- Familjarët e Aleks Nikës, njërit prej 4 të vrarëve në protestën përballë kryeministrisë më 21 janar 2011, janë paraqitur sot në SPAK ku do të merren në pyetje lidhur me kallëzimin e bërë prej tyre për zbardhjen e kësaj çështje.
Në ambientet e Prokurorisë së Posaçme, gruaja dhe xhaxhai i Aleks Nikës pritet të dorëzojnë një audioregjistrim që dyshohet se ka prova të reja lidhur me rolin e ish-kryeministrit Sali Berisha në ngjarje dhe ku gjithashtu komandanti i gardës Ndrea Prendi dyshohet se jep urdhrin për të hapur zjarr ndaj protestuesve . Fillimisht do të merret në pyetje në cilësinë e kallëzuesit Rajmonda Nika në orën 10:00 më pas xhaxhai, Mark Nika.
Më 16 korrik, SPAK njoftoi nisjen e hetimeve për masakrën e 21 janarit, ku mbetën të vrarë 4 protestues përballë kryeministrisë së vendit.
Në njoftimin e dhënë për mediat SPAK-u bën me dije se ka nisur hetimet pas vendimit urdhërues të Gjykatës së Lartë si dhe vendimit të Strasburgut. Procesimi ka nisur për 3 vepra penale si "Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim.
Menjëherë pas vendimit të SPAK për të nisur hetimet për ngjarjen ende të pazbardhur, deputeti demokrat Lulzim Basha u pyet për rolin e tij si ministër i Brendshëm asokohe në qeverinë Berisha duke u shprehur prerazi se nuk kishte qenë ai personi që kishte dhënë urdhër për të qëlluar ndaj protestuesve. Versus.al
