Prokuroria e Posaçme (SPAK) ka dërguar në laborator për ekspertim audiopërgjimin e 21 janarit të dorëzuar javë më parë, e cila sipas familjarëve të Aleks Nikës, njërit prej 4 protestuesve të vrarë, tregon se kemi të bëjmë me krim shtetëror dhe urdhër të dhënë nga lart.
Më herët është raportuar nga gazetari Artan Hoxha se audioregjistrimi është bërë nga një person që ka pasur akses në kanalin që konsiderohej i sigurt nga drejtues të lartë të Gardës. Në audioregjistrim dëgjohet kur ish-komandanti i Gardës asokohe, Ndrea Prendi urdhëron gardistët që nëse protestuesit kalojnë gardhin e vendosur para kryeministrisë të hapet zjarr luftarak, duke shtuar se kishte urdhër nga lart.
Regjistrimi është bërë me një diktofon ndërsa kaseta e dorëzuar në SPAK është origjinalja.
Tashmë laboratori pritet të provojë origjinalitetin e audiopërgjimin dhe më pas do të bëhet krahasim i zërave në audio për të përcaktuar nëse u përkasin personave që dyshohet.
Ditë më parë në SPAK u pyet edhe ish-kreu i policisë së shtetit, Hysni Burgaj dhe zëvendësi i tij asokohe Agron Kuliçaj. Të dy u morën në pyetje mbi veprimet e policisë ndaj protestuesve më 21 janar 2011 dhe për mos-respektimin e afatit 18 ditor për zbatimin e udhër arresteve për zinxhirin komandues të Gardës. Provat e reja të dorëzuara në SPAK, pritet të sjellin ndikime të rëndësishme në dosjen e hetimit për vrasjet e 4 protestuesve para kryeministrisë. Versus.al
