Gazetari investigativ, Artan Hoxha ka publikuar një pjesë të audioregjistrimit ku dëgjohet komunikimi i komandantit të Gardës Ndrea Prendi me drejtuesit kryesorë të gardës më 21 janar 2011, gjatë protestës së opozitës ku mbetën të vdekur 4 persona.
Në audiopërgjimin që Hoxha publikoi në emisionin “Të Paekspozuarit” në MCN, dëgjohet teksa Ndrea Prendi u jep urdhër anëtarëve të tjerë të gardës që të hapin zjarr luftarak në momentin që protestuesit do të kalojnë gardhin me tela të vendosur para kryeministrisë.
Hoxha tregon se komunikimi ka nisur 12 minuta para vrasjeve dhe vazhdon edhe 22 minuta pas ngjarjes së rëndë. Ndërsa zbulon se edhe ministri u i Brendshëm asokohe Lulzim Basha ka kërkuar një mjet të blinduar.
“Në asnjë moment nuk flasin për njerëz që mund të jenë vrarë ose plagosur në atë moment. Vetëm ai kërkon me insistim, ndaloni dhe ndalojnë menjëherë"- tha Hoxha për Ndrea Prendin duke bërë me dije se pas vrasjes së protestuesve flitej vetëm për numrin e gardistëve të dëmtuar.
Pjesë nga regjistrimi:
Ndrea Prendi: Artan, dëgjon?
Artan Hoxha, zv/komandanti i Gardës: Dëgjoj, dëgjoj
Ndrea Prendi: Me të kaluar gardhi i telave do të hapet zjarr luftarak
Zv/komandanti: Kuptova, kuptova
Ndrea Prendi: Ky është urdhëri
Ndrea Prendi: Dashamir, dëgjuat?!
Dy efektivë të njësisë speciale: Alfred (Alfred Ahmetcenaj) ta, ta, ta gjakos.
Ndrea Prendi: Alfred?
Alfred Ahmetcenaj: Po dëgjoj
Ndrea Prendi: Kujdes municionin! Kujdes municionin!”.
Ditën e djeshme, gazetari ishte në SPAK ku u pyet për tre orë mbi audiopërgjimin që dorëzoi lidhur me ngjarjen e 21 janarit, ku Hoxha tha se urdhri për të hapur zjarr është dhënë nga lart. Versus.al
