Bujar Hudhri, botuesi i njohur i shkrimtarit të madh, Ismail Kadare bëri një denoncim para mediave lidhur me gjendjen e ambulancës që u paraqit në banesën e kolosit të letërsisë për ta marrë mëngjesin e 1 korrikut pasi kishte pësuar atak kardiak.
Teksa përshkroi gjendjen e vështirë në të cilën e pa Kadarenë në momentet e fundit të jetës, gjatë ceremonisë së homazheve, botuesi tregoi se ambulanca që erdhi për ta transportuar drejt urgjencës së QSUT-së, nuk kishte as kushtet më minimale për t’u quajtur e tillë.
Mes të tjerash ai theksoi edhe trafikun në rrugët e Tiranës dhe vështirësinë e ambulancës për të kaluar pavarësisht se kishte ndezur sirenat, pasi shoferët nuk hapnin rrugën.
“Nuk e dija çfarë kishte ndodhur. Kur e pashë të shtrirë në korridor. Gjithmonë e shikoja në këmbë, të qeshur, solid, dukej sikur kurrë nuk do ikte nga kjo botë.
E morëm në ashensor e vendosëm, sikur të ishte në karrige, ishte në gjendje gati të ngrirë. Hipëm në ambulancë, një ambulancë shumë e thjeshtë, pa asnjë impiant që mund t’i vijë në ndihmë të sëmurit.
Me zor kemi çarë rrugët e Tiranës, edhe pse ulërinte sirena, njerëzit nuk hapnin rrugën gjersa mbërritëm në urgjencën e QSUT. Pamë mobilizimin e mjekëve, derisa kuptuam se diçka e keqe po ndodhte. Më pas heshtje,” tha Hudhri për mediat. Versus.al
