Policia e Prishtinës ka vënë në pranga katër persona në kuadër të operacionit policor të koduar ‘Starti’. Nga ky operacion janë zbuluar edhe më pas sekuestruar 25 kg marihuanë edhe armë. Policia në koordinim më Prokurorinë e Krimeve të Rënda ka realizuar katër kontrolle në vendndodhje të ndryshme në Prishtinë.
“Gjatë kontrollit janë gjetur dhe sekuestruar: 27 paketime, dyshohet të jetë marihuanë me peshë 25 kg 200 gr., një veturë, dy pushkë, dy revole, shtatë fishekë kalibrash të ndryshëm, gjashtë telefona celular dhe 350 euro. Dyshohet se lënda narkotike kishte qëllim tregun vendor. Policia ka arrestuar: B.M., (viti i lindjes 1981, mashkull kosovar), L.K., (viti i lindjes 1979, mashkull kosovar), M.K., (viti i lindjes 1979, mashkull kosovar) dhe F.H., (viti i lindjes 1991, mashkull kosovar)”, njofton policia.
Të dyshuarit për rastin janë marrë në pyetje në prezencë të avokatit mbrojtës dhe ndaj tyre është ngritur akuzë për “blerje, posedimi, shpërndarja dhe shitja e paautorizuar e narkotikëve, substancave psikotrope dhe analoge”, por edhe “mbajtja në pronësi, kontroll ose posedim të paautorizuar të armëve”.
Prokuroria ka vendosur që t'i mbajë në qeli të paktën deri në 48 orë, ndërkohë që vijohet me procedurat. /Versus.al/
