Në fshatin Përbreg të Kukësit është planifikuar të nisë ndërtimi i një landfilli për menaxhimin e mbetjeve urbane. Projekti ka hasur në kundërshtinë e banorëve, të cilët paralajmërojnë se nuk do të lejojnë zbatimin e tij, duke thënë se vendimi është marrë pa konsultim publik dhe se rrezikon mjedisin dhe jetesën e tyre.
Sipas banorëve, landfilli do të krijojë ndotje për tokat bujqësore, burimet e ujit dhe ajrin, duke ndikuar drejtpërdrejt në shëndetin e tyre. Ata shprehen të vendosur se do të ndjekin çdo rrugë ligjore për të ndalur projektin.
‘’Jemi boll fshat i përmbytur, na ka mbytur Fierza, ujë të pijshëm nuk kemi, me na sjellë këtu edhe bërlloqet këtu’’.
‘’Leje që nuk po bëjnë asanjë investim, por po vijnë e na përmbytin këtu.’’
‘’Me e çu kancerin në shtëpi time e tek shokët e mi, kurrë nuk jam dakord. Nuk kemi ku të shkojmë 400 hektarë i ka marrë liqenin. Ku të shkojmë ku të mbytemi?’’- u shprehën disa prej banorëve të zonës.
Më 28 gusht, në prezantimin që u bë nga Mirela Kumbaro për Reformën e Menaxhimit të Integruar të Mbetjeve 2025–2030, ish-ministrja e Mjedisit njoftoi se landfilli në Përbreg do të ndërtohet me financim të Bashkimit Europian dhe kap vlerën e 19 milionë eurove. Shqiperia do të ndahet në 10 zona menaxhimi, me qëllim ndërtimin e impianteve dhe landfilleve të reja që plotësojnë standardet e BE-së. Landfilli i Perbregut është parashikuar të shërbejë për tre bashki: Kukës, Has dhe Tropojë, dhe dë përfshijë grumbullimin, seleksionimin dhe riciklimin e mbetjeve urbane.
Ndërkohë që deri më tani nuk është publikuar ndonjë studim për ndikimin që do të kishte landfilli në shëndetin e banorëve. Versus.al
