Komisioni i Posaçëm Antikorrupsion, i krijuar pasi vetë kryeministri Edi Rama e lajmëroi në Kongresin e PS duket se ka dështuar të bindë institucionet e drejtësisë për nevojën e pranisë së tyre në veprimtarinë parlamentare.
Fillimisht SPAK dhe Prokuroria e Përgjithshme bënë me dije se nuk do të dërgonin përfaqësues apo ekspertë në komisionin e posaçëm të drejtuar nga deputeti Fatmir Xhafaj, më pas Gjykata Kushtetuese njoftoi të njëjtën gjë, duke theksuar se Kushtetuesja nuk merr pjesë në procese ligjbërjeje.
Sot Prokuroria e Posaçme konfirmoi qëndrimin e mëparshëm, duke bërë me dije se nuk e sheh të nevojshme pjesëmarrjen në një komision të tillë. Po ashtu edhe Inspektoriati i Lartë i Drejtësisë nuk ka pranuar të dërgojë përfaqësues.
“Në mënyrë unanime të gjithë Prokurorët e Posaçëm nuk e konsideruan të nevojshme pjesëmarrjen me ekspert në këtë Komision, pasi vlerësuan se tashmë institucioni ynë i ka përmbushur detyrimet ligjore për bërjen publike të problematikave të hasura gjatë ushtrimit të funksioneve të tij duke përfshirë këtu dhe nevojat për ndryshime ligjore përkatëse. Ky detyrim ligjor është realizuar përmes publikimit të Raporteve Vjetore të SPAK në faqen zyrtare, si dhe raportimeve periodike përballë KLP-së dhe Kuvendit. Nga ana tjetër, Prokuroria e Posaçme, cilësoi se është e gatshme për të ofruar kontributin e saj përmes dhënies së mendimeve ligjore sa herë që do të konsiderohet e nevojshme nga ky Komision”- thuhet mes të tjerash në reagimin e SPAK.
Kështu, komisioni i posaçëm mbetet vetëm me praninë e deputetëve socialistë dhe të ndonjë zyrtari që mund të thirrin gjatë veprimtarisë së tyre, por institucionet më të rëndësishme e bojkotuan. Versus.al
