Dy turiste nga Hollanda kanë përjetuar momente ankthi në zonën malore të Qerretit, Pukë, pasi humbën orientimin gjatë një ecjeje në natyrë. Pas njoftimit të marrë nga qytetarë të zonës, shërbimet e Komisariatit të Policisë Pukë janë vënë menjëherë në lëvizje për të lokalizuar dhe ndihmuar turistet e huaja.
Forcat policore u nisën drejt zonës së thellë malore, ku për disa orë kërkuan intensivisht deri sa bënë të mundur gjetjen e turisteve. Njëra prej tyre, shtetasja me inicialet K. D., kishte pësuar dëmtime të lehta si pasojë e një rrëzimi gjatë ecjes në terrenin e vështirë.
Pas ofrimit të ndihmës së parë dhe sigurimit të largimit të tyre nga zona malore, turistet hollandeze shprehën mirënjohjen për efektivët e Policisë së Pukës, për profesionalizmin dhe gatishmërinë e treguar.
Drejtoria Vendore e Policisë Shkodër ka theksuar përmes një njoftimi se vijon të jetë maksimalisht e angazhuar për të garantuar sigurinë e turistëve dhe vizitorëve që zgjedhin të eksplorojnë natyrën shqiptare.
