Gjykata e Posaçme ka konfirmuar masën e sigurisë “arrest me burg” për të fortin e Shkodrës Safet Bajri, vëllain e tij Behar Bajri dhe Asmer Bilalin të cilët akuzohen si bashkëpunëtorë në vrasjen e Fatbardh Licit në vitin 2018.
Avokati i Safet Bajrit tha se klienti i tij ishte dorëzuar vetë dhe se nuk ka pasur ndonjë operacion për kapjen e tij. Ndërsa rrëfeu mes të tjerash se ka dhënë edhe gjurmë të ADN të tij e cila i është kërkuar për të ballafaquar provat e gjetura në vendngjarje.
Behar Bajri dhe Asmer Bilali ndodhen të arrestuar që prej 2023-it në kuadër të operacionit 'Metamorfoza' ku u zbuluan ngjarje të shumta kriminale në të cilat ishin përfshirë edhe zyrtarë policorë.
Të premten e 23 shkurtit, Safet Bajri mbërriti në ambientet e bllokut të sigurisë në Tiranë ku u shfaq i buzëqeshur teksa shoqërohej nga efektivët e RENEA-s.
Disa ditë para arrestimit, Bajri pati një ndërhyrje live në emisionin "Top Story" ku tha se të gjitha akuzat e bëra ndaj tij ishin të pavërteta dhe mohoi lidhjen me ngjarjen e ndodhur më 30 tetor të vitit të kaluar në Dobraç ku mbetën të vrarë 4 persona.
Vrasja e Fatbardh Licit e ndodhur në 2018-ën dyshohet të jetë ndër ngjarjet e para që më pas sollën zinxhirin e vrasjeve në përplasjet e përgjakshme mes fisit Lici e Bajri në Shkodër. Policia po e heton Safet Bajrin edhe për masakrën e Dobraçit pavarësisht se ai e ka mohuar përfshirjen e tij. Versus.al
